د افغانستان کرېکټ ملي لوبډلې نن دوشنبه د کویینز سپورټس کلب لوبغالي کې د زیمبابوې پر وړاندې په دویمه ټېسټ لوبه کې په ۷۲ منډو دوه اړخېزو ټېسټ سیالیو کې خپله لومړنۍ بریا د ۱-۰ په پایله سره ونمانځله.
دا د افغانستان لپاره په ټېسټ کرېکټ کې څلورمه بریا ده، چې د دې لوبډلې ځای په دې اوږدمهالي فارمټ کې لا پیاوړی کوي.
لوبه د افغانستان د کمزورې چلند سره پیل شوه، چې په لومړي پړاو کې یې ټولټال ۱۵۷ منډې جوړې کړې او وسوځېد.
د زیمبابوې توپاچونکو، په ځانګړي ډول بلسینګ موزاراباني (۴-۴۸)، لوبه په خپل لاس کې واخیسته. په ځواب کې، زیمبابوې ۲۴۳ منډې وکړې او په ۸۶ منډو يې برتري ترلاسه کړه.
خو افغانستان په دویمه پاڼۍ کې په زړه پورې بريا خپله کړه. رحمت شاه د ۱۳۹ فوق العاده منډو او عصمت عالم خپل لومړنی ټېسټ لوبه کې (۱۰۱ منډو) په جوړولو لوبډلې سره د ۳۶۳ منډو جوړولو کې مرسته وکړه. دې کارکردګۍ د زیمبابوې لپاره ۲۷۸ منډو جوړولو سخت هدف وټاکه.
راشد خان لوبه د افغانستان په ګټه بدله کړه. په لومړي پاڼۍ کې یې د ۴-۹۴ په توپ اچونه ټیم په لوبه کې وساته، خو په دویم پړاو کې یې د ۷-۶۶ په زړه پورې توپ اچونې سره د زیمبابوې ته د هدف ترلاسه کول ناشوني کړل. د زیمبابوې لوبډلمشر کریګ ایرون د ۵۳ منډو هڅې وکړې، خو د ماتې مخه يې ونه شوه نېولاى او کوربه ټیم د ۷۲ منډو په پاتې کېدو په ۲۰۵ منډو وسوځېد.
د راشد خان بې سارې کارکردګي د دې لامل شوه چې د لوبې د غوره لوبغاړي جایزه ترلاسه کړي. هغه ټولټال ۱۱ وېکټې (۴-۹۴ او ۷-۶۶) ترلاسه کړې او د توپ وهونکي په توګه یې هم ۲۵ او ۲۳ منډې وکړې، چې د ټیم په بریا کې يې مهمه مرسته وکړه.
رحمت شاه د دې لوبلړۍ غوره لوبغاړی وټاکل شو، ځکه، چې هغه پکې یو ٢٠٠ او یوې سليزې په ګډون په منځنۍ کچه د ۱۳۰.۶۶ سره ۳۹۲ منډې جوړې کړې.
