د افغانستان د کورنیو تولیداتو نندارتون د هېواد د ۲۵۰ سوداګرو په ګډون په تاشکند کې جوړ شو.
په دې نندارتون کې د افغانستان غالۍ، قیمتي ډبرې، لاسي صنایع او وچه میوه نندارې ته ایښودل شوې دي.
د یادولو وړ ده، چې دغه نندارتون به نن (سه شنبه، د چنګاښ ۱۲مه) پیل او درې ورځې به دوام وکړي.
د طالبانو تر ادارې لاندې د صنایعو او سوداګرۍ وزارت ویلي، چې د دغه نندارتون د جوړېدو موخه د افغاني تولیداتو وده، د دواړو هېوادونو ترمنځ د سوداګریزو اړیکو پراختیا او د خصوصي سکتور ملاتړ دی.
د طالبانو تر ادارې لاندې ملي ټلویزیون ویلي، چې د دغه نندارتون په پرانیسته کې د طالبانو د سوداګرۍ وزیر نورالدین عزیزي هم ګډون کړی و.
په همدې حال کې د هېواد یو شمېر صنعتکاران او سوداګر په خپلو فعالیتونو کې د ننګونو له شتون څخه شکایت کوي.
دغه افغان صنعتکاران او سوداګر د مالیاتو لوړوالی، د کافي برېښنا نشتوالی، په بانکونو کې محدودیتونه او د خامو موادو لوړه بیه د دوى په وړاندې د لویو ستونزو په توګه یادوي.
