د شنبه هاى ارغواني غورځنګ د امریکا د استازو جرګې له خوا له طالبانو سره د امریکا د مرستو د کمولو د پرېکړه ليک د تصويب هرکلی کړی دی.
د ښځو د دغه اعتراض غورځنګ په خبرپاڼه کې راغلي «موږ د امريكا د استازو پر جرګې او حکومت غږ کوو چې د دې لایحې ملاتړ وکړي او په افغانستان کې د یرغمل شویو خلکو ؛ په ځانګړې توګه د ښځو د ملاتړ لپاره پر طالبانو بندیزونه ولګوي.»
دغه غورځنګ همداراز د امریکا له حکومته غوښتي چې د طالبانو تر واک لاندې افغانستان ته د ۲.۸ میلیارد ډالرو مرستې په اړه معلومات وړاندې کړي.
د شنبه هاى ارغواني غورځنګ وايي، امریکايي مالیه ورکوونکي او د افغانستان خلک باید په دې پوه شي، چې دغه فنډ (د طالبانو تر کنټرول لاندې افغانستان ته د امریکا ۲،۸ میلیارده ډالره مرسته) څنګه کارول شوې ده.
دې غورځنګ پخپله خبرپاڼه کې ویلي،«د طالبانو د ځاني اعلان شوي او د ښځو ضد رژیم د دوام او د نړیوالو ترهګرو په مرکز د افغانستان د بدلېدو یو لامل پټې او ښکاره نړیوالې مرستې دي، چې په کې ۴۰ میلیونه ډالري اونيزه مرسته هم شامله ده.»
د شنبه هاى ارغواني غورځنګ وايي چې« طالبان دا پيسې د افغان ولس څپنې؛ په ځانګړې توګه، ښځې، زیان منونکي توکمیزې ډلو او مذهبي لږکيو، د بشریت ضد جرمونو، جنسیتي تبعيض او د هیواد د وګړو په منځ کې دوېره په رامنځته کولو د خپل ناقانونه حکومت د ټينګښت لپاره کاروي.»
د يادونې وړ ده، چې د امریکا د استازو جرګې درې ورځې وړاندې یوه لایحه تصویب کړه چې پر بنسټ یې له طالبانو سره د امریکا ټولې مرستې بندېږي.
دا لایحه اوس د متحده ایالاتو مشرانو جرګې ته وړاندې شوې او له تصویب وروسته به پلي شي.
د ښځو دغه اعتراضي غورځنګ د امریکا پر کانګرس هم غږ کړی چې د امریکا پر حکومت فشار راوړي؛ څو د سراج الدین حقاني د نیولو لپاره جدي اقدام وکړي.
شنبه هاى ارغواني غورځنګ د ملګرو ملتونو د امنیت شورا له خوا د طالبانو د کورنیو چارو وزیر او د حقاني شبکې د مشر سراج الدین حقاني د سفر د معافیت غځول «د افغانانو پر وړاندې ستر ظلم» بللی دی.
دا په داسې حال کې ده، چې امريکا د حقاني شبکې د مشر او د طالبانو د کورنيو چارو د وزير سراج الدين حقاني د نيولو پر سر لس ميليونه ډالره جايزه ټاکلې ده.
خو په ورته وخت کې د ملګرو ملتونو امنیت شورا هغه ته متحده عربي اماراتو او سعودي عربستان ته د سفر لپاره معافيت ورکړى دى.
