شری یوه ویروسي ناروغي ده، چې تر ډیره په کم عمره او هغو ماشومانو کې رامنځته کیږي، چې واکسین یې نه وي ترلاسه کړي.
پکتیکا کې د طالبانو د عامي روغتیا ریاست د پېښو د ثبت مدیر عمران وایې: «تر اوسه په پکتیکا کې د شري تر ۳۰۰ زیاتې پېښې ثبت شوې دي، خو دا هغه ماشومانو کې وو، چې له وړاندې واکسین ورته تطبیق شوی و. تر اوسه پورې موږ د شرې له امله د مړینې پېښه نه ده ثبت کړې او دلته هره ورځ پر شري اخته ماشومان راوړل کیږي، خو د هغوی بدن معافیت لري او ژر یې درملنه کیږي.»
د د شري ناروغۍ واکسین دوه دوزه لري چې لومړی دوز یې په نهه میاشتنی او دوهم دوز یې په اتلس میاشتنی کې تطبیق کیږي.
د پکتیکا ولایت د ولایتي روغتون یو ډاکټر عزتالله وایې: «شری په تر ۴-۶ میاشتو ټیټ او ځينو کوچنيانو کې آن تر ۹ مياشتنۍ پورې غیرمعموله ده. د دغې ناروغۍ نښې ټوخی، پوزې څخه اوبه بهېدل او وروسته پر پوستکي باندې سره هموار خاپونه دي، چې لومړی د غوږونو له شاتنۍ برخې څخه پیل بیا غاړه وروسته مخ بيا ټول اطرافو ته خپريږي. همدارنګه سخته تبه ورسره وي. ماشوم بېاشتها او ناارامه وي او د مستقیم تماس په واسطه انتقالیږی.»
پر یادې ناروغۍ د اخته ماشوم مور ګل بشره وایې: «ماشوم مې سخت ژړل، تبه یې وه له دوو ورځو وروسته یې د غوږو شاته او بیا په ټول مخ او بدن سرې وړې دانې پیدا شوې ډاکټرانو ویل درملنه یې اسانه ده تبه یې هم اوس کمه شوې ده.»
د داخله ناروغیو متخصص ډاکټر سردار ولي یې د درملنې لارې راښیې: «څنګه چې نوموړې ناروغي يوه ويروسي ناروغي ده، نو داسې درمل چې د ناروغۍ دوران را كم كړي نشته، یوازې د علایمو درملنه کیږي، مور او پلار بايد د ماشوم تبه هر شپږ ساعته اندازه كړي او د تبې د راكمولو درمل وركړي، د اوبو بخار د ماشوم د وچ ټوخي په كمولو كې اغېزمن دی.»
پکتیکا کې د شري ناروغۍ د مخنیوي لپاره څو ورځي وړاندې لس ورځنی پراخ کمپاین کې زرګونه ماشومان واکسین شول، ترڅو د یادې ناروغي په پیښو کې کمښت او د ماشومانو د مړینې خطر راکم کړی.
