امریکايي چارواکو ویلي، په لاس ویګاس کې د امریکا د منتخب ولسمشر ډونلډ ټرمپ نړیوال هوټل ته څېرمه د ټیسلا سایبري موټر د چاودنې له امله د دغه موټر چلوونکی مړ شوی او ۷ نور ټپیان شوي دي.
د رویټرز د راپور له مخې، دا پېښه د چهارشنبې په ورځ (د مرغومي په ۱۲مه) رامنځته شوې او د عیني شاهدانو له خوا اخیستل شوې ویډیوګانې ښيي چې موټر له هوټل بهر وچاودېده او اور يې واخيست.
د تحقیقاتو فدرالي ادارې (اېف بي آى) ویلي دي چې په دې اړه څېړنې کوي چې آیا دا چاودنه «ترهګريز» عمل و که نه.
دا چاودنه څو ساعته وروسته له هغه وشوه چې یوه سړي د نوي کال په ورځ په نیو اورلینز کې د خلکو پر ګڼه ګوڼه یوه لارۍ برابره کړه او ۱۵ کسان یې ووژل.
د لاس ویګاس د میټروپولیټین پولیسو څانګې مشر کوين مک میل په یوه خبري کنفرانس کې وویل: «په ښکاره ډول ، د ټرمپ هوټل ته نږدې د دې پېښې په اړه ډیری پوښتنې شته چې ځوابولو ته اړتیا لري.»
د اېف بي آى ځانګړي استازي جیرمي شوارټز له پېښې وروسته خبریالانو ته ويلي، تر اوسه څرګنده نه ده چې چاودنه تروریستي عمل و او که نه.
هغه وویل: «زه پوهیږم چې هرڅوک د دې کلمې سره علاقه لري او هڅه کوي چې وګورو چې آيا موږ کولی شو ووایو، هو، دا یو ترهګریز برید دی. دا زموږ موخه ده او دا هغه څه دي چې موږ یې د ترسره کولو هڅه کوو.»
د اېف بي آى ځانګړي استازي زیاته کړه چې څېړنيزې ادارې د هغه موټر چلوونکی پېژندلی چې په کولوراډو کې اجاره کړی و. خو تر اوسه نه دی چمتو شوی چې په عمومي توګه د موټر چلوونکی په اړه معلومات ترلاسه کړي.
