رحمت شاه د افغانستان د کرېکټ په تاریخ کې د ټېسټ فارمټ یوې لوبې کې د ۲۳۱ منډو په جوړولو سره په دې فارمټ کې تر ټولو زیاتې منډې جوړې کړې.
د زيمبابوې پر وړاندې د لومړنۍ ټېسټ لوبې په درېيمه ورځ د زيمبابوې په کوئنز سپورټس کلب لوبغالي کې نوموړي په زړه پورې وړتيا وښوده.
رحمت شاه او حشمت الله شهیدي د دې لوبې په درېیمه ورځ په داسې حال کې چې ملي لوبډلې خپل دوه لوبغاړي له لاسه ورکړي وو، وکولى شول د افغانستان منډې ۴۲۵ ته ورسوي.
رحمت شاه ۲۳۱ او حشمت الله شهیدي ۱۴۱ منډې جوړې کړې. دغه دوه لوبغاړي به نن (یکشنبه، مرغومي ۹مه) هم خپلو لوبو ته دوام ورکړي.
د دې دوه سوه منډو په جوړولو سره رحمت شاه د افغانستان پخوانی ریکارډ مات کړ چې په ۲۰۲۱ کال کې په ابوظبۍ کې د زمبابوې پر وړاندې حشمت الله شهيدي د ۲۰۰ ناټ اوټ منډو په جوړولو سره ثبت کړی وو.
هغه په ۴۱۶ توپونو ۲۳ څلوریزې او ۳ شپږیزې ووهلې.
زمبابوې سخته لوبه وکړه او په ۹۵ آورونو کې یې یوه وېکټه هم ترلاسه نه کړه. د دغې لوبې په لومړۍ پاڼۍ کې زمبابوې ۵۸۶ منډې جوړې کړي.
په ټېسټ لوبو کې د افغانستان پرمختګ
د رحمت شاه او شهیدي ملګرتیا د افغانستان لپاره په ټېسټ لوبو کې د لومړۍ وېکټې پرته ورځ وه، چې د لوبې په اوږد فارمټ کې د لوبډلې پرمختګ په ګوته کوي.
رحمت شاه په خپل صبرناک خو مستند چلند سره د لوبې اصلي ستنه وه، په داسې حال کې چې شهیدي په ارامه او مهارت سره په ټېسټ سیالیو کې خپلې دویمه سلیزه جوړه کړه.
رحمت شاه نه یوازې ملي ریکارډ مات کړ بلکې د لوبې په اوږد فارمټ کې یې هم د افغانستان مقاومت نندارې ته وړاندې کړ.
د څلورمې ورځې په پیلېدوبه افغانستان هڅه وکړي چې خپلې امتيازات زیات کړي او زمبابوې په دویمه پاڼۍ کې تر فشار لاندې راولي.
