په یوه ورځ کې څه باندې ۲۰۰ افغان کډوالې کورنۍ له ایران او پاکستان څخه ویستل شوې او هېواد ته راستنې شوې دي.
د طالبانو تر ادارې لاندې باختر اژانس په یوه راپور کې ويلي چې پرون (جمعه د تلې ۲۰مه) له ایران او پاکستان څخه د هېواد ۲۱۰ کډوالې کورنۍ په «جبري او اختیاري» توګه ویستل شوې دي.
د دغه راپور له مخې دغه کډوال د هرات، نيمروز، قندهار او ننګرهار ولايتونو له لارو هېواد ته داخل شوي دي.
د طالبانو تر ادارې لاندې دغه اژانس وايي چې ۲۸ کورنۍ د تورخم او ۲۲ کورنۍ د سپین بولدک له لارې افغانستان ته راستنې شوې دي.
په همدې حال کې د نیمروز ولایت د پل ابرېشم۵۰ کورنۍ او همدا راز د اسلام کلا له لارې ۱۱۰ کورنۍ هېواد ته راستنې شوې دي.
په همدې حال کې، د آمو د یوې څېړنې موندنې ښیي چې «بېکاري» او «خراب اقتصادي وضعیت» د هیواد د اتباعو د غیرقانوني کډوالۍ بنسټیز لاملونه دي.
دا څېړنه په ٧ ولایتونو کې د ښځو په ګډون له ۳۳ کسانو سره شوې چې د غیر قانوني کډوالۍ تجربه یې درلوده.
له دې جملې څخه ۴۵.۴ سلنه ګډونوالو ویلي چې دوی د «خراب اقتصادي وضعیت» له امله په ناقانونه توګه کډوالۍ ته اړ شوي؛ خو ۹ سلنه یې دا هم ویلي چې دوی واک ته د طالبانو له راتګ سره د احتمالي جګړې له وېرې ناقانونه کډوالي پیل کړې ده.
