ټیلیګراف ورځپاڼې د فرانسې د کورنیو چارو د وزیر جرالډ دارونین په حواله راپور ورکړی چې د دغه هېواد پولیسو د پاریس د ۲۰۲۴ کال د المپیک د سیالیو پر مراسمو د بريد د پلانولو په تور د داعش د خراسان څانګې یو شمیر کسان نیولی دی.
که څه هم ښاغلي دارونين د دغو کسانو شمېر په ډاګه کړى نه دى؛ خو وايي چې دغه کسان د دوو بېلابېلو پېښو په تړاو نيول شوي دي.
دا په داسې حال کې ده، چې د داعش سره د تړلو کسانو د فعالیت زیاتوالی په فرانسه کې؛ په ځانګړي توګه د ٢٠٢٤ کال د پاریس د المپیک لوبو په څنډه کې له جدي امنیتي اندېښنو څخه دى.
تر دې مخکې لوېدیځو رسنیو خبر ورکړی و، چې د مسکو په څنډه کې د موسیقۍ پر یوه کنسرټ پر تالار باندې د داعش د خراسان له برید وروسته، لوېدیځ په اروپا او امریکا کې د دغې ډلې له احتمالي بریدونو اندېښمن دي.
دغو رسنیو د لویدیځو چارواکو په حواله لیکلي چې داعش خراسان په لودیدځو هیوادونو کې پر هدفونو د بریدونو پلان لري؛ خو اوس دا توان نه لري.
د ۲۰۲۴ کال د پاریس د المپیک د لوبو په ننداره کوونکو باندې د داعش خراسان څانګې احتمالي برید د لویدیځو هیوادونو؛ په ځانګړې توګه د فرانسې جدي اندیښنه ده.
ټاکل شوې د ۲۰۲۴ کال المپیک لوبې د جولای له ۲۶مې څخه د اګست تر ۱۱مې او د پاریس د ۲۰۲۴ پارالمپیک لوبې د اګست له ۲۸مې څخه د سپټمبر تر ۸مې د فرانسې په پلازمېنه پاریس کې ترسره شي.
