سراجالدین مهرالدین، وزیر خارجه تاجیکستان، در یک تماس تلفنی با امیرخان متقی، وزیر خارجه طالبان، درباره وضعیت مرزها میان افغانستان و تاجیکستان گفتگو کرده است.
وزارت خارجه طالبان در خبرنامهای گفته که «روابط سیاسی، همکاری اقتصادی، وضعیت مرزی، هماهنگی امنیتی و ابتکارهای منطقهای» از موارد گفتگو میان دو طرف بوده است.
بر بنیاد این خبرنامه، متقی در این صحبت تلفنی گفته است که برخی از «حلقات» در تلاش تخریب روابط تاجیکستان با طالبان هستند. او حمله اخیر مسلحانه بر شهروندان چینی در تاجیکستان از خاک افغانستان را محکوم کرده و بر اهمیت همکاریهای دو طرف برای ثبات منطقه تاکید کرده است.
وزیر خارجه طالبان گفته است که آنان آماده انجام هرنوع تحقیقات و همکاری در باره این رویداد هستند.
طالبان به نقل از وزیر خارجه تاجیکستان گفتهاند که او در این تماس بر حمایت از همکاریهای مرزی تاکید کرده است.
وزارت خارجه تاجیکستان تاکنون در مورد این صحبت تلفنی چیزی نگفته است.
این در حالی است که در حمله مسلحانه روز چهارشنبه هفته گذشته در مرز تاجیکستان با افغانستان، سه شهروند چینی کشته و یک تن دیگر زخمی شده است.
این حمله در شهر ختلان در جنوب غربی تاجیکستان رخ داد و سفارت چین در دوشنبه در پی این رویداد از شهروندان این کشور خواست منطقه مرزی را فوراً ترک کنند.
طالبان هویت این گروه را مشخص نکردند اما افزودند که آنان ارزیابی اولیه حادثه را انجام داده و کاملاً با تاجیکستان برای بررسی و پیگیری این حمله همکاری خواهند کرد.
بر بنیاد گزارشها، برای نخستینبار از خاک افغانستان حملهای مسلحانه و پهپادی به خاک تاجیکستان انجام شده است. این رویداد در منطقهٔ شمسالدین ختلان رخ داده؛ نقطهای مرزی که در جنوب‑غرب تاجیکستان قرار دارد و از جنوب و جنوبشرقی با افغانستان حدود ۴۲۰ کیلومتر مرز مشترک دارد.
با این حال، وزارت امور خارجهٔ تاجیکستان اعلام کرده که این حمله بر اردوگاه کارکنان یک شرکت چینی به نام «الالسی شاهین اسام» در محدودهٔ پاسگاه مرزی استقلال انجام شده و در نتیجهٔ آن سه کارگر چینی جان باختهاند.
مقامهای تاجیکستان میگویند این حمله با استفاده از یک پهپاد حامل نارنجک و همچنین سلاح گرم صورت گرفته و «گروههای جنایتکار مستقر در خاک افغانستان» همچنان با اقدامهای بیثباتکننده، امنیت این مرز طولانی را تهدید میکنند.
گفتنی است که در ماه گذشته هیئتی از مقامهای ارشد امنیتی و خارجه تاجیکستان به کابل آمد و دیدارهایی با برخی از مقامهای ارشد طالبان نیز داشت.
