د امنیت شورا له پرېکړه لیک څخه د څه باندې درېیو میاشتو په تېرېدو سره، لا هم ملګرو ملتونو تر اوسه د افغانستان لپاره د ځانګړي استازي د ټاکلو په اړه پرېکړه نه ده کړې.
دغه سازمان وايي، د ځانګړي استازي د ټاکلو بهیر دوام لري او تر اوسه په کې کوم پرمختګ نه دی شوی. ملګري ملتونه پرته له دې چې د دې پروسې په اړه نور جزئیات ورکړي، ټینګار کوي چې نوي معلومات به ډیر ژر خلکو ته وړاندې کړي.
له دې سره، ټاکل شوې چې د جون په میاشت کې یو ځل بیا ملګري ملتونه د افغانستان لپاره د ځانګړي استازي د ټاکلو په موخه د هېوادونو د ځانګړیو استازو د غونډې کوربه وي.
یو شمېر کارپوهان وايي، که څه هم د دې استازي ټاکل د نړیوالې ټولنې لومړیتوب دی؛ خو طالبان به په دې اړه هوکړه ونه کړي.
د امنیت شورا په ۲۷۲۱ پرېکړه لیک کې د افغانستان لپاره د ملګرو ملتونو د ځانګړي استازي د ټاکلو وړاندیز شوی. که څه هم د ملګرو ملتونو سرمنشي ته په دغه پرېکړه ليک کې له ښکېلو غاړو سره د سلا مشورو لپاره ۶۰ ورځې وخت ورکړل شوی و، خو بالاخره اوس چې له دغه پرېکړه ليک څخه څه باندې درې مياشتې تېرې شوې، دغه سازمان نه دی توانېدلی چې د افغانستان لپاره د ځانګړي استازي د ټاکلو په اړه پرېکړه وکړي.
اسټیفان دوجاریک، د ملګرو ملتونو د سرمنشي ویاند وایی: «نه. دا بهیر دوام لري. هرکله چې کومه نوې موضوع وه، زه هیله لرم چې وکولای شم له تاسو سره یې شریکه کړم.»
د ملګرو ملتونو د خپلواکې ارزونې پر بنسټ، چې د دغه سازمان د پخواني همغږي کوونکي فریدون سینیرلي اوغلو له خوا ترتیب شوې، د افغانستان لپاره د امریکا ځانګړي استازي له یوې خوا په نړیواله ټولنه کې د دغه هېواد د بیا یوځای کېدو بهیر هڅوي او له بلې خوا، په افغانستان کې د بېلابېلو لوریو ترمنځ د مذاکرې بستر چمتو کوي، د ښځو په معنی لرونکي او بشپړ ګډون سره د ټول ګډون حکومت د جوړولو لید.
که څه هم په دوحه کې د فبرورۍ په میاشت کې غونډه په همدې موخه جوړه شوې وه، خو تر اوسه د ملګرو ملتونو د دغه ځانګړي استازي د ټاکلو په اړه کوم پرمختګ نه دی شوی او له بلې خوا د ملګرو ملتونو لخوا پروسه چې د افغانستان د سیاسي راتلونکي لپاره د لارې نقشه بلل شوې په دې وروستیو کې له بحثونو خالي ده،
طالبان د افغانستان لپاره د ملګرو ملتونو د ځانګړي استازي د ټاکلو مخالف دي؛ په همدې ډول د سیمې ځینې هېوادونه د ملګرو ملتونو د خپلواکې ارزونې په ځینو برخو کې د طالبانو له دریځ سره همغږي دي. له همدې امله، دا بهیر چې له جدي ننګونو سره مخ دی.
برنا صالحي، د نړیوالو اړیکو کارپوه وایی: «که طالبان هوکړه ونه کړي او د افغانستان لپاره د ملګرو ملتونو استازی ونه ټاکل شي او بشپړ نه شي، زه فکر کوم چې د طالبانو انزوا به دوام وکړي او له طالبانو سره به د نړیوالې ټولنې اړیکې هماغه ډول وي چې دوه کاله مخکې وې، دا به د طالبانو په زیان وي نه په ګټه.»
په افغانستان کې د ملګرو ملتونو د سرمنشي مرستیال وايي، ټاکل شوې د جون په میاشت کې د افغانستان د مسئلې په اړه د هېوادونو د ځانګړي استازي درېیمه غونډه جوړه شي.
هغه غونډه چې لا یې د اجنډا مهمه برخه د افغانستان لپاره د ځانګړي استازي د ټاکلو په اړه سلا مشورې دي. او هغه بهیر چې ډیری باور لري چې د سیاسي، اقتصادي او بشري حالت لپاره ور خلاصوي.
