په ملګرو ملتونو کې د امریکا سفیرې لینډا توماس ګرینفیلډ د دغه سازمان د امنیت شورا په غونډه کې خبرداری ورکړی چې روسیه د شمالي کوریا د اټومي وسلې منلو ته نږدې شوې ده.
د رویټرز راپور له مخې، په ملګرو ملتونو کې د متحده ایالاتو سفیرې وویل:«د اندیښنې وړ، موږ ارزونه کوو چې روسیه ممکن د شمالي کوریا د اټومي وسلو پروګرام منلو ته نږدې وي او د کوریا ټاپووزمې د بې وسلې کولو لپاره د مسکو لسیزې ژمنې بېرته واخلي.»
دا په داسې حال کې ده، چې مسکو او پیونګ یانګ د خپلو مخ پر ودې همکارۍ دفاع کوي، او د روسیې د بهرنیو چارو وزیر سرګي لاوروف د روان کال په سپټمبر کې وویل چې مسکو د شمالي کوریا د «بې وسلې کولو» مفکورې ته د یوې تړلې مسلې په توګه ګوري، او د پیونګ یانګ منطق د دغه هېواد د دفاع د بنسټ په توګه د اټومي تکیه کولو اړتیا په اړه درک کوي.
خو توماس ګرینفیلډ وايي: «موږ باور لرو چې مسکو نه یوازې د پیونګ یانګ د اټومي وسلو پر پراختیا انتقاد کوي؛ بلکه، دا به د نورو بندیزونو یا پرېکړه لیکونو مخه ونیسي چې د شمالي کوریا د بې ثباته کولو چلند غندي.»
دا په داسې حال کې ده، چې جنوبي کوریا او برېټانيې دواړو د سپتمبر په میاشت کې د روسیې د بهرنیو چارو د وزیر پر څرګندونو نیوکه کړې او ویلي یې دي چې د هغه څرګندونو د نړۍ د باثباته کولو نظام کمزوری کړی دی.
په ملګرو ملتونو کې د برېټانيې مرستیال سفیر جیمز کاریوکي د لاوروف څرګندونې«د بشپړې، د تایید وړ او نه بدلېدونکي بې وسلې کولو له منل شوي اصولو څخه بې پروايي» وبلله.
خو په ملګرو ملتونو کې د روسیې سفیر واسیلي نیبنزیا په امنیت شورا کې د خپلې وینا پر مهال د شمالي کوریا د اټومي پروګرام یادونه ونه کړه. هغه د مسکو او پیونګ یانګ ترمنځ د مخ پر ودې همکارۍ د روسیې د حاكميت حق وباله.
هغه د شمالي کوریا د رسمي نوم لنډیز په کارولو سره وویل:«له شمالي کوریا سره د روسیې همکاري د نړیوال قانون سره سم ده، نه سرغړونه.دا اقدام د کوم درېیم هیواد پر ضد ندی.»
د یادونې وړ ده چې د ۲۰۲۲ کال په فبرورۍ کې پر اوکراین د برید وروسته روسیې له شمالي کوریا سره نږدې ډيپلوماتیکې او پوځي اړیکې ټینګې کړې او د روسیې ولسمشر ولادیمیر پوتین او د شمالي کوریا مشر کیم جونګ اون هم د یو بل له هېوادونو لیدنه کړې ده.
