ملګرو ملتونو د مخابراتو د نړیوالې اتحادیې د نویو شمېرو پر بنسټ په یوه راپور کې ویلي، چې په نړۍ کې د انټرنېټ کارول مخ په ډېرېدو دي او په ۲۰۲۴ کال کې به شاوخوا ۵،۵ میلیارده کسان پر ليکه وو.
د دغه راپور له مخې، د ۲۲۷ میلیونه کسان پرليکه کېدلو احصایه د تېر کال په پرتله ډېروالی ښيي، خو نابرابرۍ لاهم په ټیټ عاید لرونکو سیمو کې شتون لري.
په داسې حال کې چې اټکل کېږي د نړۍ د نفوس ٦٨ سلنه اوس پرليکه دی، راپور وايي؛ خو «سرسخت ډیجیټل» سستوالى دوام لري ،د نړۍ شاوخوا درېیمه برخه نفوس آفلاین دى.
د مخابراتو د نړیوالې اتحادیې عمومي منشي ډورین بوګدان مارټین وویل: «د ٢٠٢۴کال حقایق او ارقام د لوړ عاید او ټیټ عاید هیوادونو ترمینځ د دوه ډیجیټل واقعیتونو کیسه بیانوي.«د ارتباط په مهمو شاخصونو کې ناخالصې تشې د آنلاین لاسرسي څخه خورا زیان منونکي خلک محروموي.»
د انټرنیټ د کارولو د زیاتوالي لاملونه
د دې اتحادیې احصایې همداراز ښیي چې د انټرنیټ کارول د پراختیا له کچې سره تړاو لري.
په لوړ عاید لرونکو هېوادونو کې، اټکل کیږي چې ٩٣سلنه نفوس په ٢٠٢۴ کې انټرنیټ کارولى دى. خو دا د ټیټ عاید هېوادونو سره چیرې چې یوازې ٢٧ سلنه نفوس آنلاین دي، توپیر لري.
د مخابراتو ننګونې په لږ پرمختللو هېوادونو کې هم شتون لري، چیرې چې یوازې ٣۵سلنه نفوس آنلاین دي، او اټکل کېږي چې د وچې پورې تړلي پرمختیایي هېوادونه یوازې ٣٩سلنه آنلاین دي.
دا په داسې حال کې ده، چې د مخابراتو د نړیوالې اتحادیې د شمېرو له مخې، سږ کال ټولټال ۲،۶ میلیارده کسان له آفلاين وو، چې د نړۍ ۳۲ سلنه نفوس جوړوي.
په داسې حال کې چې په ٢٠٢٣کال کې، ٢.٨ ميلیارد خلک، چې د نړۍ د نفوس ٣٥سلنه برخه جوړي، آفلائن وو.
