پاکستاني رسنیو راپور ورکړی، چې پاکستان به نږدې یو ملیون افغانان «مدرک» مهاجرینو د ویستلو په هدف د مهاجرینو د باسلو دوهم پړاو پیلولو ته تیاری نیسي.
ډان ورځپاڼې په یوه راپور کې لیکلي، چې د ولسوالیو او پولیسو چارواکو ته امر شوی، چې په ټول هېواد کې د دي کډوالو د استوګنې ځاي په اړه معلومات راټول کړي.
په دې راپور کې یولوړ پوړی چارواکي، چې نه یې غوښتل نوم یې واخیستل شي، وویل چې د ولسوالیو ادارې او پولیسو ته یې امر کړی چې د افغان تابعیت کارت لرونکو کسانو د ځای پرځای کولو لړی په چټکه سره پیل شي.
په داسې حال کې چې د پیل نیټه نده ټاکل شوې، تمه کیږي چې د سلګونو زرو شناختي کارت لرونکو د ایستلو پروسه به د اوړي په نیمایي کې پیل شي، د فدرالي حکومت لخوا تصویب ته انتظار باسي.
د ډان په وینا، د خیبر پښتونخوا چیف سیکرټري عابد مجید وویل: «موږ لا دمخه د نقشې کولو پروسه پیل کړې ده. دا بهیر به د روژې له مبارکې میاشتې وروسته زیات شي او هیله لرو چې دا بهیر د اپریل تر ۳۰مې (ثور ۱۱) بشپړ شي».
د ملګرو ملتونو شمېرې ښايي چې په پاکستان کې ۲٫۱۸ میلیونه افغان کډوال ژوند کوي.
په دې شمېره کې هغه ۱٫۳ میلیونه کډوال هم شامل دي چې په ۲۰۰۶ او ۲۰۰۷ کې یې کارتونه ترلاسه کړي دي. او په ۲۰۱۷ کال کې ۸۸۰ زره نورو دا کارتونه ترلاسه کړي دي.
د اسد په ۱۴۰۰ کې واک ته د طالبانو له راستنیدو وروسته چې د پخواني حکومت د ړنګیدو لامل شو، د افغانانو یوه لویه ډله پاکستان ته ننوتله.
پاکستاني چارواکي د دغو کسانو شمېر له ۶۰۰،۰۰۰ څخه تر ۸۰۰،۰۰۰ پورې اټکل کوي، چې ځینې یې د سفر کره اسناد نه لري خو راتلونکی یې ناڅرګند دی.
د تېر کال له اکټوبر (۱۴۰۲) راهیسې تر اوسه پاکستان له نیم میلیون ډېر بې اسناده کډوال له افغانستانه ایستلي دي.
مرستندویه ادارې راپور ورکوي چې راستانه شوي کډوال په افغانستان کې د سرپناه، خوړو او کاري فرصتونو له کمښت سره مخ دي.
