د ماداګاسکار پلازمېنه انتاناناریوو ښار کې د یوه لوبغالي په دروازه کې د ګڼېګوڼې په پایله کې لږترلږه ۱۲ تنه مړه او کابو ۸۰ نور ټپیان شوي دي.
تر اوسه د دې ګڼېګوڼې د رامنځته کېدل لامل روښانه نه دی.
ویل کېږي، چې زیات شمېر خلکو غوښتل د هند سمندر شاوخوا ټاپو ترمنځ د سیالیو د پرانیست په مراسمو کې د ګډون لپاره د دې هېواد ملي لوبغالي ته دننه شي.
د دې هېواد چارواکو ویلي، چې د دې پېښې د ۱۱ ټپیانو وضعیت نازک دی.
په ۲۰۱۹ زېږدیز کال کې هم د ماداګاسکار په یوه بل لوبغالي کې د ګڼېګوڼې له امله ۱۵ تنه مړه شول.
