د خیبر پښتونخوا ایالتي حکومت له طالبانو سره د مذاکرې لپاره د فدرالي حکومت تایید ته انتظار باسي. د خیبرپختونخوا اعلی وزیر اعلان کړی چې د ایالتي کچې یو پلاوی له طالبانو سره د خبرو اترو لپاره جوړ شوی، خو د مذاکرو د شرایطو او ضوابطو لپاره د فدرالي حکومت تایید په تمه دی.
سربېره پر دې، د اکوړه خټک په حقانیه مدرسه کې تر ځانمرګي برید وروسته، د خیبر پښتونخوا حکومت په یوه اعلامیه کې د افغانستان له طالبانو سره د عاجلو خبرو د پیل غوښتنه کړې ده. خیبرپختونخوا په لومړي ګام کې له طالبانو سره د تحریک طالبان پاکستان او ترهګرۍ پر موضوعاتو د بحث اراده لري.
خو ایالتي حکومت د دې لپاره، د فدرالي دولت له لوري د مذاکراتو د شرایطو او ضوابطو تایید ته انتظار باسي. په همدې حال کې، د خیبر پښتونخوا اعلی وزیر په پېښور کې د طالبانو له سرکنسل سره په خبرو کې ویلي، چې د طالبانو سره د مذاکرې لپاره یو پلاوی جوړ شوی دی. نوموړی زیاتوي، کله چې د فدرالي حکومت له خوا د شرایطو وروستي کېدو پروسه بشپړه شي، دا پلاوی به له طالبانو سره د خبرو لپاره افغانستان ته ولاړ شي. علي امین ګنډاپور زیاته کړې چې ناامنيو، پاکستان او طالبانو ته ستونزې پیدا کړې دي.
علي امین ګنډاپور ویلي: «د خیبر پښتونخوا اعلی وزیر اعلان وکړ چې د ایالتي کچې یو جرګه د افغانستان له حکومت سره د خبرو لپاره جوړه شوې ده. اوس د فدرالي حکومت له لوري د شرایطو او ضوابطو د تایید په تمه دي. کله چې دا شرایط وروستي شي، جرګه به افغانستان ته واستول شي.»
د خیبر پښتونخوا ایالتي حکومت له طالبانو سره د مذاکرې دوه پړاوونه پلان کړي دي. لومړی پړاو کې به پر امنیت او د ټي ټي پي په سر خبرې وشي ځکه چې د پاکستان له نظره، په افغانستان کې د طالبانو تر ملاتړ لاندې د تحریک طالبان پاکستان غړي حضور لري د پاکستان د ناامنۍ کچه یې لوړه کړې ده.
دوهم پړاو کې د سوداګرۍ او په پاکستان کې د افغان کډوالو پر موضوعاتو خبرې دي. خو تر اوسه فدرالي حکومت د خیبر پښتونخوا ایالتي حکومت ته له طالبانو سره د مذاکرې اجازه نه ده ورکړې. په همدې حال کې، ایالتي حکومت فدرالي دولت په دې تورونوي، چې د ترهګرۍ مسئله یې سیاسي کړې او د امنیتي وضعیت د ښه والي لپاره اقدام نه کوي.
د پاکستان د بهرنیو چارو وزارت له طالبانو سره د احتمالي مذاکراتو په اړه څه نه دي ویلي، خو دا تاییدوي چې په افغانستان کې د تحریک طالبان پاکستان د پټنځایونو شتون، د اسلامآباد او طالبانو ترمنځ اړیکې له ستونزو سره مخ کړې دي.
دغه وزارت همداراز ویلي چې د ترهګرو لخوا د پاتې امریکايي وسلو د کارولو په اړه خپله اندېښنه یې له نړیوالې ټولنې سره شریکه کړې ده.
طالبانو تر اوسه د خیبر پښتونخوا له ایالتي حکومت سره د احتمالي خبرو اترو په اړه څه نه دي ویلي. خو په افغانستان کې د تحریک طالبان پاکستان د حضور او فعالیتونو، او له هغه ځایه پاکستان ته د ګواښونو ادعاوې ردوي. په همدې حال کې، د ملګرو ملتونو امنیت شورا ویلي چې افغانستان د طالبانو تر حاکمیت لاندې د ټي ټي پي لپاره په خوندي ځای بدل شوی دی.
