رویټرز راپور ورکړی چې متحده ایالاتو پر سوریې له حاکمو یاغیانو سره په خپلو لومړیو اړيکو کې غوښتي چې د هېواد مشرتابه په “خودکاره توګه” لاس کې وانه خلي او د حکومت جوړولو لپاره ټولګډونه پروسه پلي کړي.
د دغه راپور پر بنسټ، د امريکې اړيکې له تحرير الشام سره چې پخوا يې له القاعدې سره ملګرتيا لرله او اوس هم د امريکا لخوا د يو ترهګر سازمان په توګه پېژندل کېږي،د ترکیې په ګډون په منځني ختیځ کې د واشنګټن د متحدينو په همغږۍ سره ترسره کيږي.
یوه امریکايي چارواکي چې نوم یې نه دی خپور شوی ویلي چې د امریکا حکومت همداراز د دې موضوع په اړه د امریکا د منتخب ولسمشر ډونلډ ټرمپ له ټیم سره په اړيکه کې دی.
د دغه راپور له مخې، دغه خبرې اترې چې په تېرو څو ورځو کې ترسره شوې، د واشنګټن له خوا د سوریې دننه له بېلابېلو ډلو سره د همغږۍ لپاره د پراخو هڅو یوه برخه ده، ځكه چې امریکا هڅه کوي د یکشنبې په ورځ د بشارالاسد د رژیم له نسکورېدو راهيسې ګډوډي اداره کړي.
دغه امریکايي چارواکي همداراز ویلي، چې د امریکا متحده ایالاتو دغې ډلې (هٸيت تحرير الشام) ته پیغامونه استولي تر څو د دغه هېواد لپاره د رسمي حکومتي جوړښت د رامنځ ته کولو لپاره د لومړنیو هڅو لارښوونه وکړي.
د دې خبري اژانس سرچینو له دې چې آیا دا پیغامونه په مستقیمه توګه لېږل شوي که د منځګړیو له لارې، ویلو ډډه وکړې ده.
سرچینو زیاته کړې، چې واشنګټن په دې باور دی، چې انتقالي حکومت باید د سوریې د خلکو د هیلو استازیتوب وکړي او د نویو مشرانو د ټاکلو لپاره له رسمي پروسې پرته د سوریې د تحریري شام د ادارې ملاتړ نه کوي.
د يادونې ده، چې د امريکا د ملي امنيت شورا په دې اړه له څه ويلو ډډه کړې ده.
