د ملګرو ملتونو د بشري چارو د همغږۍ دفتر (اوچا) وايي، د سپټمبر میاشتې پورې په افغانستان کې ۱۵.۳ میلیونه خلکو مرستې ترلاسه کړي دي.
دغه سازمان پر اېکس لیکلي دي چې په ورته وخت کې دوی د ملګرو ملتونو د مرستندویه ادارو له خوا د وړاندیز شویو ۳.۰۶ میلیاردو ډالرو څخه یوازې ۹۵۸،۵ میلیونه ډالر ترلاسه کړي دي.
د دغه سازمان په وینا، سږ کال د هغو کسانو شمېر چې د مرستندویه موسسو له خوا په پام کې نیول شوی، ۱۷،۳ میلیونه وو.
بشري وضعيت
دا په داسې حال کې ده، چې د اوچا په وینا په افغانستان کې ۲۳.۷ میلیونه خلک بشري مرستو ته اړتیا لري.
په ورته وخت کې د هېواد یو شمېر اوسېدونکي وايي، د ژوند یې له ستونزو سره مخ دى، چې د سرپناه، د کورونو د تودولو لپاره وسایل او کافي خواړه نه لري.
د طالبانو لاسوهنې او بنديزونه
تر دې مخکې ملګرو ملتونو له افغانستان سره د مرستو د کمېدو اصلي لامل د ښځو پر کار د طالبانو له خوا لګول شوي بندیزونه او محدودیتونه بللي وو.
له بلې خوا، اوچا مخکې د روان کال د جولای په میاشت کې د خپلو موندنو په یوه راپور کې ویلي وو چې «د مرستو رسولو په بهیر کې د طالبانو لاسوهنې» د مرستندویه ادارو لپاره محدودیتونه رامنځته کړي دي.
د ملګرو ملتونو د بشري مرستو د همغږۍ دفتر په پخواني راپور کې ویل شوي چې د ملګرو ملتونو مرستندویه ادارې د افغانستان په ۲۰۳ ولسوالیو کې چې د هېواد د ټولو ولسوالیو ۵۰،۶ سلنه جوړوي اړمنو کسانو ته “لږ لاس رسی” لري.
اوچا زیاته کړه چې دا بنسټونه په ١٨٨ ولسوالیو کې اړو کسانو ته «په منځنۍ کچه لاسرسى» لري چې د افغانستان د ټولو ولسوالیو ۴٦.٨ سلنه جوړوي.
په دې راپور کې، د بشري مرستو د همغږۍ لپاره د ملګرو ملتونو دفتر همداراز ویلي چې په لسو ولسوالیو کې مرستندویه ادارې چې د هېواد د ولسوالیو ٢.۴ سلنه جوړوي، اړو کسانو ته «پراخ لاس رسی» لري.
