د طالبانو د امر بالمعروف او نهي عن المنکر وزارت شمېرې ښيي چې د طالبانو له خوا د امر بالمعروف او نهي عن المنکر قانون له نافذېدو وروسته په لومړیو درېیو میاشتو کې د دغه وزارت محتسبینو په ۹ ولایتونو کې د ۷ ښځو په ګډون ۳۸ کسان په بېلابېلو جرمونو نیولي دي.
ډېری دغه کسان د جادو او اخلاقي فساد په تور نیول شوي دي.
خو ښځې او نجونې وايي، چې د طالبانو د دغه قانون له پلي کېدو سره د دوی ژوند له لا ډېرو محدودیتونو سره مخ شوی دی.
د امر بالمعروف او نهي عن المنکر قانون چې یوه سریزه، ۴ فصلونه او ۳۵ مادې لري طالبانو د مشر له خوا ۹۰ ورځې وړاندې توشیح شو .
په دغه قانون کې پرهېوادوالو او په ځانګړې توګه پر ښځو او نجونو ډېر سخت بندیزونه او محدودیتونه لګول شوي، تر هغه ځایه چې حتی د ښځو غږ هم محرم بلل شوی دی.
د هغو شمېرو پر بنسټ چې د طالبانو د امر بالمعروف او نهي عن المنکر وزارت څخه راټولې شوي، د دغه قانون د تصویب په لومړیو دریو میاشتو کې د دغه وزارت د محتسبینو له خوا د ۷ ښځو په ګډون ۳۸ تنه په کابل، فراه، لوګر، کندهار، بلخ، سرپل، کندز، فاریاب او پکتیا کې د جادوګرۍ او اخلاقي فساد په تور نیول شوي دي.
د طالبانو د امر بالمعروف او نهي عن المنکر وزارت د خپرو شویو شمېريو له مخې د زمري له ۳۱مې څخه د لړم تر ۲۹مې پورې ۲۳ نارینه او ۷ ښځې نیول شوي دي.
اوس يو شمېر ښاريان وايي، چې د طالبانو د امر بالمعروف او نهي عن المنکر وزارت له خوا د زياتو نيولو شاهدان دي او زياتوي، چې د طالبانو تر واک لاندې افغانستان کې د دوی ژوند ورځ تر بلې ستونزمن کېږي.
ظاهراً د طالبانو له خوا د دوی د نوي قانون له تصویب وروسته د دغه وزارت د محتسبینو واکونه هم زیات شوي او حتی په رسنیو کې د ژوندیو موجوداتو د انځورونو د خپرېدو په مخنیوي کې هم رول لري.
سره له دې چې نړیوالې ټولنې په وار وار د طالبانو د امر بالمعروف او نهي عن المنکر قانون د لغوه کولو غوښتنه کړې؛ خو د طالبانو له مشر څخه نیولې تر نورو نږدې چارواکو پورې په خپلو ولایتي سفرونو کې په پرله پسې ډول له خلکو غوښتي چې دغه قانون په جدي توګه پلي کړي.
