طالبانو په تخار ولایت کې یوه ښځه او یو سړی د «زنا» په تور په درو ووهل.
د طالبانو تر ادارې لاندې سترې محکمې په یوه خبرپاڼه کې ویلي، چې دوی پر دغو دوو تورنو هر یو «۳۹ درې» ووهل.
د دغه خبر پر بنسټ، طالبانو د دغه ولایت په فرخار ولسوالۍ کې دغه سړی او ښځه په درو وهلي دي.
طالبانو په تېره یوه میاشت کې د دغو دوو کسانو په ګډون شاوخوا ۶۰ کسان په بېلابېلو ولایتونو کې په عام محضر کې په درو وهلي دي.
د ملګرو ملتونو د بشري حقونو شورا تېره اوونۍ په یوه پرېکړه لیک کې د طالبانو له خوا د جسمي مجازاتو کارول غندلي او د بندېدو غوښتنه یې کړې ده.
بل خوا د بشري حقونو بېلابېلو بنسټونو د طالبانو دغه سزاوې له انساني ارزښتونو سره په ټکر کې بللې دي.
