په یوه ورځ کې نږدې ۳۰۰ افغان کډوالې کورنۍ له ایران او پاکستان څخه ویستل شوې او هېواد ته راستنې شوې دي.
د طالبانو تر ادارې لاندې باختر اژانس په یوه راپور کې ویلي چې د هېواد ۲۹۹ کډوالې کورنۍ پرون (چهارشنبه د تلې ۱۱مه) له ایران او پاکستان څخه په «جبري او اختياري ډول» ویستل شوې دي.
د دغه راپور له مخې دغه کډوالو د ننګرهار، قندهار، نيمروز او هرات ولايتونو له لارو هېواد ته داخل شوي دي.
د طالبانو تر ادارې لاندې دغه اژانس وايي چې ۱۹ کورنۍ د تورخم له لارې او ۴۸ کورنۍ د سپین بولدک له لارې افغانستان ته راستنې شوې دي.
په ورته وخت کې او د دغه راپور پر بنسټ، ۹۹ کورنۍ د اسلام کلا له پولې او ۱۳۳ نورې کورنۍ د نیمروز ولایت د پل ابرېشم له لارې هېواد ته راستنې شوې دي.
د آمو د یوې څېړنې موندنې ښیي چې «بېکاري» او «خراب اقتصادي وضعیت»د هیواد د اتباعو د غیرقانوني کډوالۍ بنسټیز لاملونه دي.
دا څېړنه په ٧ ولایتونو کې د ښځو په ګډون له ۳۳ کسانو سره شوې چې د غیر قانوني کډوالۍ تجربه یې درلوده.
له دې جملې څخه ۴۵.۴ سلنه ګډونوالو ویلي چې دوی د «خراب اقتصادي وضعیت» له امله په ناقانونه توګه کډوالۍ ته اړ شوي؛ خو ۹ سلنه یې دا هم ویلي چې دوی واک ته د طالبانو له راتګ سره د احتمالي جګړې له وېرې ناقانونه کډوالي پیل کړې ده.
