په یوه ورځ کې څه باندې ۳۵۰ افغان کډوالې کورنۍ له ایران او پاکستان څخه ویستل شوې او هېواد ته راستنې شوې دي.
د طالبانو تر ادارې لاندې باختر آژانس خبر ورکړى، چې پرون (جمعه د وږي د مياشتې په ٣٠مه) له ايران او پاکستان څخه د هېواد ٣۵۵ کډوالې کورنۍ په «جبري او اختياري توګه» ايستل شوې دي.
د دغه راپور له مخې دغه کډوال د ننګرهار، قندهار، نيمروز او هرات ولايتونو له لارو څخه هېواد ته داخل شوي دي.
د طالبانو تر ادارې لاندې دغه خبري اژانس وايي، ۳۳ کورنۍ د تورخم او ۵۸ کورنۍ د سپین بولدک له لارې افغانستان ته راستنې شوې دي.
په همدې حال کې د دغه راپور پر بنسټ، ۹۸ کورنۍ د اسلام کلا له پولې هېواد ته او ۱۶۶ نورې کورنۍ د پل ابرېشم له لارې هېواد ته داخلې شوې دي.
دا په داسې حال کې ده، چې د ایران د پيشوايي ښار قوماندان اکبر عربی خبرداری ورکړی چې افغان کډوال به توقیف، راټول او وشړل شي.
هغه ټینګار وکړ چې له ایران څخه د بې اسناده کډوالو د راغونډولو او ویستلو پلان عملي کول په جديت سره دوام لري.
له اېسنا خبري اژانس سره په خبرو کې د ایران د پیشوا ښار قوماندان زیاته کړې، چې د دغه هېواد د اتباعو له خوا د بې اسناده کډوالو ګمارل هم سرغړونه ده او ترسره کوونکو سره به قانوني چلند وشي.
په ورته وخت کې پاکستان هم په جبري ډول د افغان کډوالو د ويستلو لړۍ ته دوام ورکړی دی.
