په یوه ورځ کې نږدې ۳۰۰ افغان کډوالې کورنۍ له ایران او پاکستان څخه ویستل شوې او هېواد ته راستنې شوې دي.
د طالبانو تر ادارې لاندې باختر اژانس په یوه راپور کې ویلي چې د هېواد ۲۸۰ کډوالې کورنۍ پرون (چهارشنبه د وږي ۲۸مه) له ایران او پاکستان څخه «په جبري ډول او په خپله خوښه»ایستل شوې دي.
د دغه راپور له مخې دغه کډولو د ننګرهار، قندهار، نيمروز او هرات ولايتونو له لارو هېواد ته داخل شوي دي.
د طالبانو تر ادارې لاندې دغه اژانس زیاتوي چې ۱۸ کورنۍ د تورخم او ۲۳ کورنۍ د سپین بولدک له لارې افغانستان ته راستنې شوې دي.
په همدې حال کې د دغه راپور له مخې، د نيمروز پل ابرېشم له لارې ۹۳ کورنۍ او دغه راز د هرات د اسلام کلا له لارې ۱۴۶ نورې کورنۍ هېواد ته راستنې شوې دي.
دا په داسې حال کې ده، چې د ایران د پيشوايي ښار قوماندان اکبر عربی خبرداری ورکړی چې افغان کډوال به توقیف، راټول او وشړل شي.
هغه ټینګار وکړ چې له ایران څخه د بې اسناده کډوالو د راغونډولو او ویستلو پلان عملي کول په شدت سره دوام لري.
د ايران د پیشوايي ښار قوماندان له اېسنا خبري اژانس سره په خبرو کې زیاته کړه چې د دغه هیواد د اتباعو له خوا د بې اسناده کډوالو ګمارل هم سرغړونه ده او عاملينو سره به يې قانوني چلند وشي.
په ورته وخت کې پاکستان هم د افغان کډوالو جبري ايستلو ته دوام ورکړی دی.
