د پاکستان د بهرنیو چارو وزارت د دغه هېواد ملي سرود ته د طالب دیپلوماتانو سپکاوی غندلی او دا یې له دیپلوماتیکو پروتوکولونو سرغړونه بللې ده.
په پېښور کې د طالبانو سرکونسل محب الله شاکر او ملګري يې د سه شنبې په ورځ په دغه هېواد کې د يوې غونډې پر مهال د پاکستان ملي سرود د غږولو پر مهال له خپل ځايه پورته نشول ، چې د دغه هېواد د چارواکو د غصې او خپګان لامل شو.
د پاکستان د بهرنیو چارو د وزارت ویاندې ممتاز زهرا بلوچ په یو خبرپاڼه کې د طالب دیپلوماتانو دغه اقدام په کلکه غندلى او ویل يې دي: «مونږ به خپل سخت اعتراض په اسلام آباد او کابل کې د افغانستان چارواکو ته ورسوو.»
دغه غونډه چې د خیبر پښتونخوا د عالي وزیر علي امین ګنډاپور په کوربه توب جوړه شوې وه، د هغه په بلنه د طالبانو دیپلوماتانو هم ګډون کړی و. خو کله چې د پاکستان ملي سرود وغږول شو، شاکر او د هغه ملګري پخپل ځايونو ناست پاتې شول، چې دا اقدام د پاکستاني چارواکو لخوا په پراخه کچه له «ډیپلوماتیکو ادابو سرغړونه» وبلل شوه.
په همدې حال کې په پېښور کې د طالبانو ونسلګرۍ ویلي چې دوی د پاکستان د ملي سرود سره د ملې موسیقۍ له امله له درناوى ډډه کړې او ټینګار یې کړی چې هېڅکله د دغه هېواد ملي سرود ته سپکاوی نه دی شوی.
د طالبانو سرکونسل زیاته کړې: «موږ د افغانستان د ملي سرود پر غږولو هم د موسیقۍ له امله بندیز لګولی دی او که دا سرود له موسیقۍ پرته غږول شوی یا د ماشومانو له خوا ويل شوی وای، نو سرکونسل به ولاړ و او خپل لاسونه به یې پر سينه اېښى وى.»
دا په داسې حال کې ده چې د افغانستان او پاکستان اړیکې لا هم ترینګلې دي. په ځانګړې توګه له هغه وخته چې طالبان د ۲۰۲۱ کال په اګست کې په افغانستان کې واک ته ورسېدل. په داسې حال کې چې تمه کېده چې د طالبانو په واکمنۍ کې به د دواړو هېوادونو ترمنځ تاریخي اړیکې ښې شي، خو برعکس تاوتریخوالی زیات شوی دی.
