په یوه ورځ کې ۱۰۰ افغان کډوالې کورنۍ له ایران او پاکستان څخه ویستل شوې او هېواد ته راستنې شوې دي.
د طالبانو تر ادارې لاندې باختر اژانس په یوه راپور کې ویلي چې د هېواد سل کډوالې کورنۍ پرون (شنبه د وږي ۲۴مه) له ایران او پاکستان څخه په جبري او اختياري توګه ویستل شوې دي.
د دغه راپور له مخې، دغه کډوال د ننګرهار، کندهار، نیمروز او هرات ولایتونو له لارو افغانستان ته داخل شوی دی.
د طالبانو تر ادارې لاندې دغه اژانس زیاتوي چې ۳۳ کورنۍ د تورخم او ۳۱ کورنۍ د سپین بولدک له لارې هېواد ته راستنې شوې دي.
په همدې حال کې د دغه راپور پر بنسټ، ۲۰ کورنۍ د پل ابرېشم له لارې افغانستان ته راستنې شوې او همدا راز ۱۶ نورې کورنۍ د هرات د اسلام کلا له پولې څخه افغانستان ته راستنې شوې دي.
دا په داسې حال کې ده، چې له پاکستانه راستنې شوې یو شمېر کورنۍ وايي چې د دغه هېواد پولیس د دوی ټول شته ترې اخيستي او په تش لاس یې افغانستان ته لېږلي دي.
په ورته وخت کې د کډوالو په چارو کې د ملګرو ملتونو د عالي کمېسيون احصایې ښيي چې د ۲۰۲۱ کال له اګسټ وروسته او پر افغانستان د طالبانو د واکمنۍ له بیا پیلېدو راهيسې، د هېواد څه باندې ۶۰۰ زره اتباعو په پاکستان کې پناه غوښتې ده.
له بلې خوا ایراني چارواکو د وږى په دیارلسمه نېټه په یوه غونډه کې چې د افغانستان په چارو کې د دغه هېواد ځانګړي استازي حسن کاظمي قمي هم پکې ګډون کړی و، له افغان کډوالو سره د چلند لپاره نوی پلان وړاندې کړ.
په همدې حال کې د ایران د البرز ښار والي مجتبی عبداللهي تازه ویلي چې یوازې په تېر کال کې څه باندې پنځوس زره افغان کډوال له دغه ښاره ایستل شوي دي.
