پاکستاني رسنیو خبر ورکړی، چې له پاکستاني پوله ساتو سره په نښته کې اته تنه طالبان وژل شوي او ۱۶ نور ټپیان شوي دي.
د راپورونو له مخې په وژل شویو کې د طالبانو دوه مهم قوماندانان خلیل او جان محمد هم شامل دي.
جیو نیوز د پاکستان د سرحدي امنیتي ځواکونو سره د تړلو سرچینو په حواله ويلي، «افغان طالبانو د وږي په ۱۷ مه سهار په پيلواسین کې پر پاکستاني پوستو د پرمختللو وسلو په کارولو ډزې وکړې.» خو طالبانو تر اوسه د دې نښتې او مرګ ژوبلې په اړه څه نه دي ویلي.
افغانستان او پاکستان ۱۸ ګډې پولي دروازې لري، چې تورخم او چمن یې د سوداګرۍ او خلکو لپاره د ګڼې ګوڼې ځایونه دي.
دغه لارې د افغانستان له جنوبي ولایت کندهار سره د بلوچستان ایالت نښلوي.
په ٢٠١٧زيږديز کال کې، پاکستان له افغانستان سره په خپله پوله کې د اغزن سیم په جوړولو پیل وکړ ترڅو د پولې هاخوا د وسلوالو مخالفينو د تګ مخه ونیسي، چې دغه اقدام د کابل لخوا غندل شوى و.
د پاکستان د جیو نیوز د راپور پر بنسټ، په خپلو پولو کې دننه د ترهګریزو فعالیتونو د زیاتوالي سربېره، پاکستان په وروستیو میاشتو کې د ګاونډي هېواد لخوا د امنیتي ځواکونو په نښه کولو کې د پولې هاخوا بریدونو کې د پام وړ زیاتوالي شاهد دی.
