د ملګرو ملتونو د سرمنشي ویاند وايي، دغه سازمان به په افغانستان کې د طالبانو په ګډون له ټولو خواوو سره د بشري حقونو او برابرۍ لپاره کار کولو ته دوام ورکړي.
دا په داسې حال کې ده، چې د طالبانو امربالمعروف وزارت په یوه خبرپاڼه کې د يوناما د دريځ په غبرګون کې ویلي و چې دوی به په افغانستان کې د ملګرو ملتونو له مرستندویه پلاوي (یوناما) سره همکاري ونه کړي.
د ملګرو ملتونو د سرمنشي ویاند سټیفن دوجاریک په نیویارک کې یوې خبري غونډې کې ټينګار وکړ، «موږ په واضح توګه په افغانستان کې د ښځو د حضور لا زيات حذف کولو پر پرېکړې په کلکه نیوکه کړې ده.»
هغه همدا راز ټینګار وکړ چې ملګري ملتونه به د امنیت شورا لخوا د ترلاسه شوي ماموریت پر بنسټ «د طالبانو په ګډون په افغانستان کې د ټولو ډلو او همګټو هېوادونو سره تعامل» ته دوام ورکړي.
دوجاریک ټینګار وکړ چې په افغانستان کې د ملګرو ملتونو کار د بې پرېتوب، ښه نیت او بشري حقونو او برابرۍ ته د ټینګې ژمنې له اصولو سره سم رهبري کېږي. هغه پر طالبانو هم غږ وکړ چې «د دیپلوماتیکو خبرو اترو لپاره نورې لارې پرانیزي.»
د طالبانو نوی قانون چې تېره اوونۍ توشیح او نافذ شو، د نړیوالې ټولنې له پراخو نیوکو سره مخ شو.
په دغه قانون کې د ښځو لپاره د ټول بدن پټول، په عامه ځایونو کې د ښځو د غږ په اورېدلو بندیز او له نارینه پرته د ښځو پر تګ راتګ نور محدودیتونه لګول شوي دي. نارینه هم باید سخت قواعد لکه لازمي ږیره او د موټر چلولو پرمهال د میوزیک غږولو بندیز، رسنۍ هم له سختو بندیزونو سره مخ دي، چې د خلکو د انځورونو پر خپرولو بندیز هم پکې شامل دی.
د طالبانو دا قانون د امربالمعروف وزارت محتسبينو ته پراخ واکونه ورکوي چې د اخلاقي جرمونو په تور خلک ونيسي او مجازات يې کړي.
د ملګرو ملتونو د بشري حقونو کارپوهانو خبرداری ورکړی چې دغه قانون په افغانستان کې د بشري حقونو په برخه کې د پام وړ خنډ دی او د ۱۹۹۰ لسیزې د طالبانو د رژیم ياد تازه کوي.
دوی په نړیواله ټولنه او په ځانګړې توګه د ملګرو ملتونو پر غړو غږ وکړ چې د افغانستان لپاره یوه همغږې ستراتیژي جوړه کړي چې د ښځو حقونو او جنسیتي برابرۍ ته په پام سره بشري حقونو ته لومړیتوب ورکړي.
دا خپلواک کارپوهان چې د جینوا مېشته د بشري حقونو شورا لخوا ټاکل شوي، د بشري حقونو د ځانګړو مسٸلو د څارنې او راپور ورکولو دنده لري.
