په یوه ورځ کې څه باندې سل افغان کډوالې کورنۍ له ایران او پاکستان څخه وېستل شوې او هېواد ته راستنې شوې دي.
د طالبانو تر ادارې باختر اژانس راپور ورکړی چې پرون( شنبه، زمري٢٧مه) ١٠٧ افغان کډوالې کورنۍ «په جبري او په خپله خوښه» له ایران او پاکستان څخه ويستل شوي دي.
د دغه راپور پر بنسټ، دغه کډوال د ننګرهار، کندهار، نیمروز او هرات ولایتونو له لارو هېواد ته داخل شوي دي.
د طالبانو تر ادارې لاندې دغه اژانس وايي، چې ۳۲ کورنۍ د تورخم او ۴۶ د سپین بولدک له لارې افغانستان ته داخلې شوې دي.
په همدې حال کې د راپور له مخې، ۱۶ کورنۍ د نیمروز ولایت د پل ابرېشم او ۱۳ کورنۍ د هرات د اسلام کلا له لارې افغانستان ته راستنې شوې دي.
دا په داسې حال کې ده، چې په پاکستان او ایران کې افغان کډوال د توقیف او شړلو په ګډون له جدي ننګونو سره مخ دي.
د ملګرو ملتونو د راپور له مخې، پاکستان د تېر کال په اکټوبر میاشت کې له خپلې خاورې د بې اسنادو بهرنیو اتباعو د شړلو له پلان وروسته تر ۶۰۰ زرو ډېر افغان کډوال اېستلي دي.
تر دې مخکې، په ایران کې افغان کډوالو هم د ایران د حکومت او خلکو له خوا له کډوالو سره د ناوړه چلند په اړه اندېښنه ښودلې وه.
