طالبانو ویلي، د تورخم دروازه د مسافرو او بار وړونکو موټرو د تګ راتګ پر مخ پرانیستل شوې ده.
د طالبانو په وینا، دغه لار نن (شنبه، د زمري ۲۷مه) له غرمې وروسته د مسافرو او بار وړونکو موټرو د قانوني تګ راتګ لپاره په بشپړه توګه پرانیستل شوې ده.
تر دې وړاندې د ننګرهار ځايي طالب چارواکو په یوه خبرپاڼه کې اعلان کړی و، چې د تورخم دروازه د پاکستان له لوري د هر ډول تګ راتګ پر مخ تړل شوې ده.
د تورخم لاره د روان لمریز کال د زمري په ۱۱مه د بار وړونکو موټرو پر مخ تړل شوې وه او زرګونه موټر د لارې خلاصېدو ته په انتظار ولاړ وو.
