د افغانستان د امنیت د څار بنسټ په تېرو درېيو کلونو کې د داعش خراسان څانګې د بریدونو په اړه په یوه راپور کې ويلي، چې د طالبانو د درې کلنې واکمنۍ په موده کې دغه ډلې ۶۲ بریدونه ترسره کړي دي.
که څه هم، طالبانو په ځلونو په افغانستان کې د داعش شتون او فعالیت رد کړی او ویلي یې دي چې دغه ډله د هېواد امنیت ته ګواښ نه دی.
خو د افغانستان د امنیت د څار بنسټ وايي چې په تېرو درېیو کلونو کې لږ تر لږه ۸۵۷ کسان د داعش په بریدونو کې وژل شوي دي.
د دې بنسټ په وینا په تېرو درېیو کلونو کې د داعش په بریدونو کې يو زرو ۵۷۵ کسان ټپیان شوي دي.
راپور وایی، په هېواد کې د داعش په بریدونو کې ډېری وژل شوی او ټپیان ملکیان، طالبان او بهرنیان دی.
د افغانستان د امنیت د څار بنسټ وايي، د داعش خراسان څانګې په تېرو درېيو کلونو کې تر ټولو زیات بریدونه کړي، چې د ۲۰۲۲ کال کې ۲۹ بریدونه ترسره شوي دي.
د راپور پربنسټ، د طالبانو د درې کلنې واکمنۍ پر مهال د داعش بریدونه تر ډېره پر کابل متمرکز وو.
د دغه بنسټ په راپور کې راغلي، په تېرو درېیو کلونو کې کابل ۳۲، هرات ٧، بلخ ٦، ننګرهار ٤ او بدخشان ٤ بریدونه ترسره شوي دي.
دا په داسې حال کې ده چې د سیمې او نړۍ یو شمېر ګاونډیو هېوادونو په پرله پسې ډول د طالبانو تر واک لاندې افغانستان کې د بهرنیو اهدافو سره د «ترهګرو» ډلو د حضور او پراخېدو په اړه اندېښنه ښودلې ده.
په وروستۍ قضیه کې، سنډی ګارډین راپور ورکړی چې د داعش خراسان نوي ګمارل شوي غړي، په ځانګړې توګه د منځنۍ آسیا هیوادونو وګړي، د بریدونو د ترسره کولو د زده کړې او روزنې لپاره افغانستان ته سفر کوي.
