د متحده ايالاتو دفاع وزارت (پنټاګون) وايي، د سپټمبر د یوولسمې د بریدونو پلانونکي خالد شیخ محمد او د هغه دوه ملګري له امریکايي چارواکو سره د خپل جرم د منلو په اړه هوکړې ته رسېدلي دي.
سي اېن اېن راپور ورکړی چې دا جوړجاړى به دغه درې واړه د مرګ پر ځای په عمري بند محکوم کړي. د امریکا د حکومت او د دغو دریو کسانو ترمنځ له ۲۷ میاشتو راهیسې خبرې اترې روانې وې.
په همدې حال کې، څارنوالانو د سپټمبر د ١١ قربانیانو کورنیو ته لیکلي چې دوی به د محمد، ولید بن عطاش او مصطفی الحسوي لپاره اعدام، د سزا له تړون له لېست څخه لرې کړي.
په ليک کې د قربانیانو کورنیو ته ویل شوي چې وروسته له دې چې د ٢٠٢٢ کال په مارچ کې خبرې اترې پیل شوې، دغه دریو کسانو هوکړه وکړه چې د ٢زره٩٦٨ خلکو د وژنې په ګډون به په ټولو تورونو باندې اعتراف وکړي.
د لیک له مخې، محمد او نور تورن کسان به د دوی د تورونو په اړه د اوریدنې جلسو کې، چې ممکن د راتلونکې اونۍ په پیل کې ترسره شي، د سپټمبر د ١١ په بریدونو کې خپله لاس درلودنه ومني.
په بریدونو کې د لاس لرلو په تور، د امریکا حکومت د دغو مشکوکو کسانو د نيولو د قضيې په پرمخ وړلو کې چې تر ٢٠٠٣ کال پورې په پاکستان کې وو، له سختې ننګونې سره مخامخ شوى و.
