د امریکا د بهرنیو چارو وزارت امریکايي اتباعو ته خبرداری ورکړی چې افغانستان ته له سفر کولو ډډه وکړي.
د امریکا د بهرنیو چارو وزارت په یوه خبرپاڼه کې ویلي، «د ترهګرۍ، غیر قانوني توقیف، مدني ناکراریو، تښتونې او جرمونو له امله افغانستان ته سفر مه کوئ.»
په دغه خبرپاڼه کې ویل شوي چې په افغانستان کې ګڼې «ترهګرې» ډلې فعالې دي او د امریکايي اتباعو د تښتونې او یرغمل کولو موخې لري.
دغه وزارت په افغانستان کې له امریکايي وګړو غوښتي چې د امکان په صورت کې دې سمدستي له سوداګریزو لارو ووځي او هغه امریکايي اتباع چې د وتلو لپاره د امریکا له حکومته مرسته غواړي، باید بشپړ ژوندلیک او د تماس معلومات (برېښنالیک او د تلیفون شمېره) وړاندې کړي او د امریکا د پاسپورټ شمېره د دې وزارت په پته ولېږي.
د بهرنیو چارو وزارت خپلو وګړو ته په دې خبرپاڼې کې ویلي، «طالبانو مرستندویه او بشري کارکوونکي ځورولي او بندیان کړي دي. د بهرنيو فعاليتونو ته د شک په سترګه ګوري او ښايي د توقيف لاملونه ناڅرګند وي. آن که تاسو د اړوندو چارواکو سره د سوداګرۍ لپاره راجستر شوي وي، د نیولو خطر مو ډیر دی.»
دغه وزارت وايي، په کابل کې د امریکا سفارت په ۲۰۲۱ کال کې خپل فعالیتونه وځنډول. د متحده ایالاتو حکومت نشي کولی په افغانستان کې امریکايي اتباعو ته عادي یا بیړني کونسلي چوپړتياووې وړاندې کړي.
د دغه وزارت په خبرپاڼه کې راغلي، چې په افغانستان کې د امریکايي اتباعو د غیر قانوني نيونې ګواښ شته. طالبان په منظمه توګه متحده ایالاتو ته اجازه نه ورکوي چې په بند کې امریکايي اتباع د تلیفون له لارې وڅاري.
امریکا وايي چې بندې کېدنه کېدای شي اوږده وي.
د خبرپاڼې په یوه برخه کې ویل شوي: «د بندي کېدو پرمهال د متحده ایالاتو اتباع طبي پاملرنې ته محدود لاسرسی لري یا ممکنه ده فزیکي ځورونې سره مخ شي. که تاسو دوه ګونی افغان-امریکایی یاست، طالبان ممکن ستاسو د متحده ایالاتو تابعیت ونه پیژني. تابعیت یا د افغان تابعیت ادعا کول د مرستو لپاره زموږ وړتیا لا نورې هم محدودوي.»
د امریکا د بهرنیو چارو وزارت وايي، د امریکا وګړي باید په هیڅ دلیل افغانستان ته سفر ونه کړي، په دې کې د کورنۍ له غړو سره د ځای پر ځای کېدو لپاره د شرایطو وړ کسان هم شامل دي.
