په زابل ولايت کې په دوو جلا ترافيکي پېښو کې يو تن مړ شوى او شپږ نور ټپيان شوي دي.
په زابل کې د امنيه قوماندنۍ لپاره د طالبانو وياند ذبيح الله جوهر وايي چې په ټپيانو کې يوه ښځه هم شامله ده.
په دغه ولایت کې د طالبانو تر واک لاندې د آمنيه قومندانۍ د وياند د څرګندونو پر بنسټ، دا پېښه د شاجوی په ولسوالۍ کې د یو فیلډر موټر د چپه کېدو له امله رامنځته شوې ده.
همدارنګه بله پېښه د زابل ولایت په مرکز کلات ښار کې د دوو پاسو ډوله موټرونو د ټکر له امله رامنځته شوې ده.
دا په داسې حال کې ده، چې په دې وروستيو کې د هېواد په بېلابېلو لويو لارو کې ترافيکي پېښې زياتې شوې، چې له امله يې تر اوسه لسګونه کسانو ژوند بايللى دى.
په هېواد کې د طالبانو تر واک لاندې د ترافيکو رياست مسٶلينو له دې وړاندې ويلي وو، چې ډېرى دغه پېښې د موټر چلوونکو د بې احتياطۍ او د تېز سرعت له امله رامنځته کېږي.
