د طالبانو ویاند ذبیح الله مجاهد په یوه خبرپاڼه کې ویلي چې د طالبانو د مشر هبت الله اخندزاده د فرمان له مخې په یو شمېر ادارو کې نوې ګمارنې شوې دي.
د طالبانو د مشر د فرمان له مخې د طالبانو د ټکنالوژۍ او لوژستیک معين محمد ظریف مظفر د سرپل د والي او د کندهار د سپین بولدک ولسوالۍ پخوانی ولسوال عبدالله بشیر د طالبانو د دفاع وزارت د ټکنالوژۍ او لوژستيک د معين په توګه وټاکل شو.
په همدې حال کې محمد اسماعیل فاٸز د طالبانو تر واک لاندې د کور او ښار جوړونې وزارت د مسکن،ساختماني چارو او د زونونو د پراختیا معين، د غزني د اندړو ولسوالۍ لپاره د طالبانو پخوانی ولسوال سلیمان آغا بهير د نیمروز د والي مرستيال او عبدالله حماد د استخباراتو رياست د بتار قطعې مخکنى رٸيس ارکان په غزني کې د دوی د والي د مرستیال په توګه ټاکل شوی دی.
ذبیح الله مجاهد په دغه خبرپاڼه کې ليکلي، چې د غزني په زون کې د طالبانو د نظامي محکمې پخوانی رٸیس سید آغا د دوىدتر واک لاندې د دفاع وزارت عقيدتي،کلتوري او د امربالمعروف رٸيس، او د سرپل ولايت پخوانى والي عبدالرحمن اکا د ۲۰۹ الفتح قول اردو د دوهمې لوا لپاره د دوى د قومندان په توګه وټاکل شو.
په دې خبرپاڼه کې همداراز راغلي، چې د ۲۰۵ البدر قول اردو د دوهمې لواء مخکنى قوماندان محمد نسیم زرقاوي د دریمې پلي لوا د قومندان په توګه، د ۲۰۵ البدر قول اردو د لوژستیک پخوانی مشر محمد نسيم عزت د همدې قول اردو د دوهمې پلي لواء لپاره ددوى د قومندان په توګه، د ٢٠٥البدر قول اردو د لومړۍ پلي لوء د درېیم کنډک مخکنى قومندان غلام رسول د همدې قول اوردو د دوهمې پلي لواء د قومندان او رٸيس ارکان په توګه او طالبانو قول اردو او د غزني پخوانی مرستیال والي رحیم الله محمود د کندهار ولایت سپین بولدک ولسوالۍ لپاره د طالبانو د ولسوال په توګه ټاکل شوی دی.
دا په داسې حال کې ده، چې په تېرو نهو مياشتو کې د آمو د موندنو پر بنسټ، د طالبانو تر واک لاندې دولتي څوکيو کې د طالبانو ګمارنې يوازې له يوه لوري بل لوري ته د څېرو د بدلولو په مانا دي او نويو څېرو د دوی په ګومارنو کې ډېر ځای نه درلود.
په همدې حال کې د هېواد یو شمېر اوسېدونکي د بېوزلۍ پر ډېرېدو نیوکه کوي او وايي چې یو شمېر یې له دندو ګوښه شوي او د دوى بستونه د طالبانو غړو ته ورکړل شوي دي.
