طالبانو په لغمان ولايت کې د کاوون سيمه ييزې راډيو دروازه تړلې ده.
د افغانستان د خبریالانو مرکز راپور ورکړى، چې په لغمان کې د طالبانو استخباراتو ددې راډيو کارکوونکو ته ویلي چې د راډیو ودانۍ او تجهیزات يې د دولت ملکیت دی او هر هغه څه چې ددې رسنۍ په نوم دي «ضبط» به شي.
دغه بنسټ د اندېښنه په څرګندولو له «قيد او شرط پرته» د دغه رسنۍ د بیا پرانستلو غوښتنه کړې ده.
په راپور کې ویل شوي، چې د طالبانو استخباراتو د سیمه ییزې ادارې د یوه استازي او د اطلاعاتو او کلتور ریاست په حضور کې د دې سیمه ییزې راډیو دروازه وتړله.
د يادونې وړ ده، چې طالبانو د غبرګولي په څلرويشتمه ياده رسنۍ تړلې ده.
خو د افغانستان د خبريالانو مرکز په راپور کې راغلي، چې د کاوون غږ رادیو رئیس د طالبانو د اطلاعاتو او کلتور وزارت ته د هغوی د استخباراتي ادارې د کړنو په اړه شکایت کړی دی؛ خو د دې راډيو له بندېدو درې اونۍ وروسته هم، د هغې د بیا پرانستلو هڅې بې پایلې وې.
د کاوون غږ راډیو مدیر انقلابي یوسفزي ويلي، «دا راډیو په ۲۰۰۵ کال کې د انټرنیوز په مالي مرسته چې يو نړيواله موسسه ده، د لغمان ولایت په مرکز مهترلام کې تاسیس شوه.» د انټرنیوز په مالي مرسته د راډیو لپاره اړین وسایل وپېرل شول او له سیمه ییزې ادارې سره د هوکړې له مخې ورته یوه ټوټه ځمکه ځانګړې شوه او د راډیو لپاره یو پوړیزه ودانۍ جوړه شوه.”
په همدې حال کې په لغمان کې د طالبانو په سیمه ییزه اداره کې یوې سرچینې د افغانستان د خبريالانو مرکز ته ويلي، چې د دوی د استخباراتو له خوا د راډیو بندول یو موقتي اقدام دى او دا راډیو د« بيت المال» ده (دولت پورې اړه لري) نو ډېر ژر به يې د اداره کولو څرنګوالي او د بیا پیلولو په اړه پرېکړه وشي.
دا په داسې حال کې ده، چې طالبانو د افغانستان په غږیزو، چاپي او انلاین رسنیو باندې له واک ته د رسیدو راهیسې سخت سانسور او بنديزونه لګولي دي.
د راپور پر بنسټ په افغانستان کې د طالبانو د بيا واک ته رسېدو راهيسې لسګونه غږیزې، چاپي او انلاین رسنۍ تړل شوې دي.
په ځینو مواردو کې د دوى د استخباراتي ادارو په ګډون د طالبانو ادارو په هېواد کې د یو شمېر رسنیو دروازې تړلې دي.
