د افغانستان د ښځو د سیاسي مشارکت شبکې د افغانستان په اړه د دوحې په دریمه غونډه کې د کاناډا د دریځ هرکلی کړی دی.
دغې شبکې په یوه خبرپاڼه کې ویلي، د کاناډا دریځ د عدالت، جنسیتي برابرۍ، بشري حقونو او د ښځو حقونو ته د درناوي په برخه کې ددې هېواد د ملاتړ ښکارندويي کوي.
د ښځو د يادې شبکې په خبرپاڼه کې راغلي، «موږ افغان ټولنیز فعالان او د ښځو د حقونو مدافعان د کاناډا د حکومت له دریځ څخه چې د ښځو، مدني ټولنې او قومي او مذهبي لږکيو د ملاتړ په برخه کې کړي، مننه او قدرداني کوو.»
د افغان ښځو دغه شبکې همداراز د ملګرو ملتونو او نړیوالې ټولنې له خوا له افغان ولس په وړاندې د طالبانو سره د چلند په اړه اندېښنه څرګنده کړې ده.
کاناډا د يوې خبرپاڼې په خپرولو سره ویلي چې دا «ژوره توګه ناهيلې» ده چې تنظیموونکو د دوحې په دریمه ناسته کې د غیر طالب استازي له ګډون څخه بې برخې کړي دي.
د افغان ښځو د سیاسي مشارکت شبکې په خبرپاڼه کې راغلي، «افغان ولس هېڅکله د ښځو څپونکې طالبانو ډلې ته مشروعیت نه ورکوي.»
دا په داسې حال کې ده، افغانستان په اړه په دوحه کې دریمه ناسته پرون (دوشنه د چنګاښ ١١مه) د ملګرو ملتونو په کوربه توب او د طالبانو د پلاوي او د هېوادونو د استازو په ګډون پای ته ورسېده.
خو د دوحې د غونډې په اجنډا کې د ښځو، مدني ټولنو استازو او د طالبانو تر واک لاندې افغانستان کې د ښځو د حقونو په اړه بحث نه و.
