په داسې حال کې چې د دوحې په ناسته کې د طالبانو ګډون تایید شوی، یو شمېر ښځې او نجونې له نړیوالې ټولنې غواړي چې د دوحې په ناسته کې د بشري حقونو مسٸلو ته لومړیتوب ورکړي او د ښځو او نجونو پر حقونو دې معامله نکوي.
دغه ښځې او نجونې وايي، چې اوسمهال د طالبانو د بندیزونو له امله په ټولنه کې له خپلو ټولو حقونو بې برخې دي.
بل خوا یو شمېر سوداګر او د خصوصي سکټور استازي وايي، نړیوالو بندیزونو د افغانستان خصوصي سکتور په ځانګړې توګه د پیسو د لېږد په برخه کې له ستونزو سره مخ کړی او د دوحې په ناسته کې دې د سوداګرو پر دغه ستونزه خبري وشي.
په دې وروستیو کې د طالبانو د بهرنیو چارو وزارت اعلان کړی چې دوی به د دوحې په درېیمه ناسته کې ګډون وکړي او د دوحې د ناستې په جوړښت او اجنډا کې هر ډول بدلون به په دغه ناسته کې د دوی د پلاوي د ګډون پر پرېکړې اغېز وکړي.
اوس ددې په غبرګون کې، ځينې ښځې او نجونې وايي چې د دوحې په درېيمه غونډه کې بايد نړيواله ټولنه د ښځو او نجونو حقونه له پامه ونه غورځوي او د دوحې د غونډې په اجنډا کې دې د بشري حقونو مسايلو ته لومړيتوب ورکړل شي.
یوه محصله وايي:«موږ د ملګرو ملتونو له استازو څخه غوښتنه کوو چې د دوحې په راتلونکې غونډه کې د ښځو د حقونو په اړه خبرې وکړي او زده کړو ته لومړیتوب ورکړي.»
ځينې کورنۍ پر طالبانو نيوکې کوي او وايي، چې طالبانو د خپلې نږدې درې کلنې واکمنۍ پر مهال ښوونځي او پوهنتونونه د نجونو پر مخ تړلي او د نجونو ټول خوبونه يې له منځه وړي دي.
د کابل یو اوسېدونکی وايي: «طالبانو د نجونو برخلیک له خاورو سره خاورې کړى او دوی يې له زده کړو پاتې کړي. دوی زده کړه نه کوي، ښوونځي او پوهنتونونه يې تړلي. زما د اولادونو په څیر په زرګونو نور اولادونه په کور کېنولى. نه درس، نه ښوونځی، نه پوهنتون؛ ټولې هیلو او ارمانونو له خاورو سره خاورې کړي.»
ځینو سرچینو آمو ټلویزیون ته ویلي، چې طالبانو د دوحې په درېیمه ناسته کې د خصوصي سکتور د ګډون، د نشه یي توکو او د موسمي بدلون موضوعاتو شاملول د خپل ګډون لپاره شرطونه ایښي او ویلي یې دي، چې په دې ناسته کې باید د بشري حقونو پر موضوع خبرې ونه شي.
د سوداګرۍ او پانګونې خونې پخوانی مشر اقتصادي وده او د سوداګرۍ هوساینه د رسمي سیاسي ادرس په شتون پورې تړلې ګڼي او په دې باور دي چې د دغه ادرس په نشتوالي او د مناسبو اسانتیاوو په نشتون کې خصوصي سکټور نشي کولای خپل کارونه په سمه توګه ترسره کړي.
د سوداګرۍ او پانګونې د خونې پخوانی رییس آذرخش حافظي وايي: «د رسمي سیاسي ادرس نشتوالی ددې سبب ګرځي چې موږ ونشو کولی له نړیوالو سرچینو او د پیسو لېږد نړیوال سویفټ سیسټم ته د نه لاسرسي له امله پور واخلو. زه هیله لرم. د دوحې غونډه به د افغانستان ستونزې هوارې کړي.»
د خصوصي برخې یو شمېر غړي وايي، چې د طالبانو له راتګ وروسته له هېواده د پیسو په لېږد کې له ځانګړو ستونزو سره مخ شوي او سوداګر نه شي کولای خپلې پیسې د بانکونو له لارې ولېږدوي.
تر دې وړاندې هم د افغانستان د خصوصي برخې استازي د طالبانو له خوا د بیروکراسۍ پر شتون او د حکومونو پر زیاتوالي نیوکې کړې دي.
د سوداګرۍ خونې د مدیره پلاوي یوه غړي پر سوداګرو د طالبانو فشارونه او د طالبانو له خوا په بېلابېلو نومونو د پیسو ټولول په ډاګه کړل او ویې ویل چې د دې ستونزو مخه باید ونیول شي.
