په بامیان کې د طالبانو د والي د رسنیو دفتر په دغه ولایت کې د وېجاړونکو سېلابونو خبر ورکړی دی.
د طالبانو تر ادارې لاندې ملي تلويزيون په باميان کې د طالبانو د والي د سنيو دفتر په حواله په يوه راپور کې ويلي چې په دغو سېلابونو کې ٢٠٥ جريبه کرنيزه ځمکه، ١٢ کورونه او ٢٦ کيلومتره سړک ويجاړ شوى دى.
د دغه راپور پر بنسټ په دغو سېلابونو کې ۶۱ څاروي هم له منځه تللي دي.
د يادونې ده، چې دغه سېلابونه د دې ولايت په سيغان او ګلستان سيمو کې راوتلي دي.
دا په داسې حال کې ده، چې په تېره يوه مياشت کې د افغانستان په يو شمېر سيمو کې سختو سيلابونو د سيمې اوسېدونکو ته ډېر مالي او ځاني زيانونه اړولي دي.
د راپورونو له مخې په بغلان، غور او فاریاب ولایتونو کې دغو سیلابونو له نږدې ۴۰۰ کسانو ژوند اخيستى دى.
