دبشري حقونو په برخه کې د افغانستان لپاره د ملګرو ملتونو ځانګړي استازي ریچارډ بنیټ په افغانستان کې له شپږم ټولګي څخه پورته د نجونو د ښوونځیو د ۱۰۰۰ ورځې بندېدل وغندل.
ښاغلي بنیټ په يوې خبرپاڼه کې ويلي چې د نجونو په تعلیم باندې د «نه منلو وړ او له تصوره لرې » ،زر ورځني بندیز سربېره ، په میلیونونو افغان نجونې خپلو هيلو ته دوام ورکوي.
هغه زیاته کړه: «موږ باید په همغه اندازه د دوی تر څنګ په ټينګ هوډ سره ودرېږو.»
بنيټ پر نړیوالې ټولنې همداراز غږ وکړ چې د افغان نجونو د زده کړې د حق لپاره کار وکړي.
د ملګرو ملتونو ځانګړی راپورورکوونکى وويل: «موږ باید په ګډه په افغانستان کې د هرې نجلۍ د زده کړې له حق څخه دفاع وکړو. زده کړې نه یوازې د انسان حق دی؛ بلکې د یوې غوره، برابرې او هوسا نړۍ لپاره یو پیاوړی کتلست دی.»
طالبانو واک ته له رسېدو وروسته د ١٤٠٠هـ ش کال د وږي په مياشت کې له شپږم ټولګي څخه پورته نجونې ښوونځي ته له تګ منعې کړې.
