محمد باقر قالیباف رئیس مجلس شورای اسلامی ایران در سفری به تاجیکستان با برخی از رئیسان مجلس‌های کشورهای منطقه به‌شمول تاجیکستان در مورد افغانستان گفتگو کرده است.
هرچند جزئیات این گفتگو پخش نشده؛ اما رسانه‌های ایرانی گفته‌اند که تامین ثبات و امنیت در افغانستان، مبارزه با موادمخدر و قاچاق اسلحه از موضوعات مهم این گفتگو‌ها بوده‌اند.
این سفر دو روزه آقای قالیباف به هدف شرکت در مراسم سی‌ومین سالگرد تصویب قانون اساسی تاجیکستان و اشتراک در یک نشست پارلمانی بین‌المللی در تاجیکستان بوده است.
گفتنی است که نشست بین‌المللی پارلمانی در تاجیکستان، با حضور حدود ۱۰ رئیس مجلس از کشورهای منطقه و به دعوت رئیسان دو مجلس تاجیکستان برگزار شده است.
رئیس مجلس شورای اسلامی ایران در این نشست، روی ضرورت فعالیت بیش‌تر در سازمان‌های بین‌المللی از جمله اتحادیه میان مجلس‌ها و سازمان‌های آسیایی و اسلامی نیز تاکید کرده است.
محمد باقر قالیباف پس از بازگشت از این سفر، به خبرنگاران در ایران گفته است که در این سفر ملاقات‌هایی دو جانبه با رستم امامعلی رئیس مجلس ملی، محمد ظاهر ذاکرزاده رئیس مجلس نمایندگان و امامعلی رحمان رئیس جمهور تاجیکستان نیز داشته است.
این در حالی است که کشورهای منطقه به‌شمول تاجیکستان و ایران از نفوذ و گسترش فعالیت‌های داعش خراسان نگران هستند.
پیش زا این مقام‌های این کشورها گفته‌اند که حضور گروه‌های «هراس‌اکن» در افغانستانِ زیر اداره طالبان، تهدید جدی برای امنیت امنطقه و جهان است.
