دولت تاجیکستان سهمیهای برای جذب کارگران مهاجر از افغانستان تعیین کرده است.
بر اساس گزارش رسانههای تاجیکستان، این کشور برای سال جاری میلادی جذب ۵۲۰ کارگر افغانستان را تصویب کرده است.
در گزارش روز دوشنبه «کالیبر از» آمده است که از این میان، ۴۲۰ تن در شهر دوشنبه، پایتخت تاجیکستان، مشغول به کار خواهند شد.
پیش از این، مقامهای تاجیکستان گفته بودند که این کشور در مجموع قصد دارد حدود ۵۵۰۰ نیروی کار خارجی جذب کند.
بر اساس تصمیم دولت تاجیکستان، بیش از ۳۲۰۰ تن از این کارگران به دوشنبه، نزدیک به ۱۲۰۰ تن به مناطق تحت اداره مرکزی، بیش از ۷۰۰ تن به ولایت سغد، ۳۱۰ تن به ختلان و ۶۰ تن به بدخشان اختصاص داده خواهند شد.
تاجیکستان با آن که اداره طالبان را به رسمیت نشناخته، اما از سال گذشته به دنبال سفر والی بلخ طالبان به دوشنبه، روابطی با آنان آغاز کرده که عمدتا مبتنی بر مسایل اقتصادی و نگرانیهای امنیتی این کشور است.
