په افغانستان کې یو شمېر کارګر ماشومان وايي چې، که کار ونه کړي، کورنۍ به یې وږي پاتې شي.
دغه ماشومان زیاتوي، چې خپلو کورنیو ته د ډوډۍ د برابرولو لپاره اړ شول چې ښوونځي پرېږدي.
دوی له مرستندویه بنسټونو غوښتنه کوي، چې له دوی سره مرسته وکړي، څو زده کړې وکړي.
هغه په ۱۳ کلنۍ کې، د خپلې کورنۍ کې یوازینی ګټیالی دی.
د شپږو کسانو کورنۍ چې د ورځې او شپې له ۸۰ تر ۱۰۰ افغانیو عاید لري.
وايي، اړ شو چې د خپلې کورنۍ د ملاتړ لپاره ښوونځی پرېږدي.
ارمان یې و، چې ښوونکی شي خو بېوزلۍ ترې دغه ارمان هم واخیست.
هغه زیاتوي: «د ورځې شل یا دېرش افغانۍ کار کوم او یو کوچنی ورور لرم چې هغه هم کار کوي، په کور کې بل د اړتیاوو برابروونکی نه لرو.»
دا یوازې بسم الله نه دی، د ده په څېر ډېر ماشومان په هېواد کې د بېوزلۍ د ډېرېدو قرباني شوي دي.
د یونیسف د معلوماتو پر بنسټ په افغانستان کې شاوخوا ۱.۶ میلیونه ماشومان په سختو کارونو بوخت دي.
یو بل کارګر ماشوم وايي: «له ورور سره مې په بازار کې کار کوم او که موږ نه وو، څوک نشته چې زموږ لپاره ډوډۍ راوړي.»
همداراز یو بل کارګر ماشوم وايي: «موږ اړ یو چې ښوونځی پرېږدو او کار وکړو؛ ځکه په کور کې د ډوډۍ راوړلو بل څوک نه لرو، وروڼه مې تر ما کوچني دي چې کار نه شي کولای.»
د ملګرو ملتونو د ماشومانو ملاتړ صندوق تر دې مخکې ویلي وو چې په افغانستان کې شاوخوا ۱۶ میلیونه ماشومان ساتنې او بشري مرستو ته اړتیا لري.
تر دې مخکې د ملګرو ملتونو د بشري مرستو د همغږۍ دفتر اعلان کړی و، چې تر ۲۰۲۴ کال پورې په افغانستان کې نږدې ۲۴ میلیونه وګړي د ژوندي پاتې کېدو لپاره بشري مرستو ته اړتیا لري.
په ورته مهال د مرستندویه بنسټونو د معلوماتو پر بنسټ، په روان کال کې ۷.۸ میلیونه ماشومان کافي خواړه نه لري.
