پاکستاني چارواکي وایي چې د دې هېواد په شمال لوېدیځ کې د پولیسو پر یوه مرکز په برید کې، لس د پولیسو افسران وژل شوي او شپږ نور ټپیان دي.
دا برید نن شپه (دوشنبې د جنورۍ اتمه) د درېیو بجو په شاوخوا کې د خیبرپښتونخوا په ابان سیمه کې شوی دی.
ددې ایالت پولیسو ویلي چې بریدګرو له نښه ویشتونکو ټوپکو هم کار اخیستی دی.
د خیبرپښتونخوا ایالت په ابان کې د پولیسو یو مسوول ملک عنیس الحسن په وینا بریدکوونکو له لاسي بمونو هم په دې برید کې کار اخیستی چې د ګڼ شمېر تلفاتو لامل شوی دی.
دا برید د پاکستان په بېلابېلو سیمو کې د ترهګریزو پېښو له زیاتوالي سره په یو وخت شوی دی.
په پاکستان کې ددغو ناامنیو په لړ کې، ټاکل شوې په روانه اوونۍ کې په دې هېواد کې سراسري ټاکنې هم ترسره شي. تراوسه کومې ډلې ددې پېښې مسوولیت نه دی منلی.
