یو له پخوانیو جهادي مشرانو محمد اسماعیل خان له آمو سره په مرکه کې له تېرو دوو لسیزو راهیسې په افغانستان کې د امریکا حضور اشغال بولي او وايي چې د طالبانو واکمني به تر درېیو یا پنځو کلونو ډېر دوام ونه کړي.
نوموړی په دې خبرو کې ټینګار کوي چې په مسکو کې د طالبانو د سیاسي مخالفینو وروستیو ناستو او په دوشنبه کې د هرات امنیتي غونډې ته هیله مند دی چې په افغانستان کې د سیاسي حل لپاره مرسته وکړي، خو په وروستي پړاو کې پر پوځي اختیار هم غور کوي.
دی وايي: «په نړۍ کې هېڅ هېواد تر اشغال لاندې نه شي پاتې کېدی او د افغانستان په څېر بې وزله هېواد تر ډېره وخته تر اشغال لاندې پاتې کېدو ته اړ دی چې بیارغونې ته ورسیږي، امریکایان هم چې د کومې لویې موخې لپاره راغلي وو، ترلاسه یې نه کړه.»
هغه د افغانستان سقوط د “سپارنې طرح” بولي او د هرات د سقوط په اړه وايي چې د هرات امنیتي چارواکو د جنګېدو انګیزه نه درلوده.
محمد اسماعیل خان زیاتوي: «هم د قول اردو قومندان او هم د کورنیو چارو وزارت مرستیال چې د امنیتي ځواکونو د تنظیمولو لپاره راغلي وو، ټول دولتي مامورین چې د امنیت چارې یې پر غاړه وې، مخکې له دې چې طالبان راشي ملکي جامې یې واغوستې او تسلیمېدو ته تیار شول.»
ښاغلی اسماعیل خان همدارنګه وايي چې د طالبانو د مخالفو جبهاتو د پوځي اقدام په ګډون د هر اقدام ستاینه کوي او په مسکو کې د طالبانو د مخالفینو ناستې او په دوشنبه کې د هرات امنیتي غونډې ته هیله مند دی، خو په وروستي پړاو کې پوځي اختیار هم لري.
د دغه پخواني جهادي مشر په وینا د طالبانو واکمني به تر پنځو کلونو ډېره دوام نه وي.
هغه وايي: « فکر کوم چې طالبان به ښايي تر درې یا پنځه کالو ډېر پاتې نه شي.»
که څه هم د جمهوري ریاست له نسکوریدو دوه کاله تیریږي، خو ویل کیږي چې د طالبانو د مخالفو جبهو تر منځ د ګډو نظریو نشتوالی او تر یوه چتر لاندې د پخواني حکومت د سیاسي او پوځي مشرانو نه شتون تل له نیوکو سره مخ شوي.
