طالبان وايي چې د دوی د «سرحدي ځواکونو» یوه پلاوي ازبکستان ته په سفر کې د دغه هېواد له سرحدي ځواکونو سره کتلي دي.
د طالبانو تر ادارې لاندې باختر خبري آژانس لیکلي چې په دې کتنه کې «د سرحدي ځواکونو ترمنځ د ښې همغږۍ، د ګډو پولو خوندیتوب او د امنیت پیاوړتیا» په اړه خبرې اترې شوې دي.
دا په داسې حال کې دي چې ازبکستان او تاجکستان تل د دواړو هېوادونو پر امنیت د افغانستان د ناامنۍ د اغېز په اړه اندېښنه څرګنده کړې ده.
د تاجکستان ولسمشر تېره اونۍ په یوه ناسته کې وویل چې «احساس کوي په افغانستان کې د ترهګرو ډلو فعالیتونه زیات شوي دي.»
