د سویس هوايي شرکت سي اېچ اوشېن وايي، د امریکا د هوايي چلند ادارې د افغانستان پر فضا د سوداګریزو الوتنو لپاره نوي مقررات وضع کړي، چې پر اساس یې سوداګریزې الوتکې کولی شي د افغانستان له فضا ۳۳ زره فوټه لوړ پرواز وکړي.
په دغه راپور کې راغلي چې په افغانستان کې د داعش او نورو ترهګرو ډلو د شتون له امله امریکا خپلو الوتکو ته د افغانستان له فضايي حریم د ۳۳ فوټه پورته کم د تېرېدو اجازه نه ورکوي.
د امریکا د فډرالي ادارې د اعلان پر بنسټ، د جولای میاشتې په ۲۵مه امریکايي او اروپايي سوداګریزو الوتکو له افغانستانه خپلې الوتنې بیا پیل کړې.
اوس تازه د سویس هوايي شرکت سي اېچ اوشېن خبر ورکړی چې د امریکا د هوايي چلند ادارې له افغانستانه د خپلو سوداګریزو الوتکو د تېرېدو لپاره نوي مقررات وضع کړي دي.
د دې مقرراتو پر بنسټ، الوتکې نشي کولای د افغانستان له فضا څخه له ۳۳ زره فوټه ټيټه الوتنه وکړي، په داسې حال کې چې د نورو هېوادونو الوتکې معمولاً د سمندر له سطحې څخه ۲۸ زره فوټه لوړوالي کې الوتنه کوي.
د دغه راپور په یوه برخه کې له ۳۳ زره فوټه ښکته الوتنه په افغانستان کې د ترهګرو ډلو د فعالیتونو له امله خطرناکه بلل شوې ده.
د سویس د هوايي چلند شرکت د راپور په یوه برخه کې راغلي: «د دوامداره ترهګريزو فعالیتونو، د طالب ځواکونو د کنټرول د نشتوالي او په ټول افغانستان کې د ډېرو وسلو د زېرمو له امله تر ۳۲ زره فوټو لاندې امنیتي وضعیت لا هم خطرناک دی.»
د سویس هوايي چلند شرکت سي اېچ اوشېن وايي چې دا مقررات به د ملکي هوايي همکاريو اياتا او د هوایي ټرانسپورټ نړيوالې اتحادیې (ICAO) لخوا د ارزونې پراساس پلي شي.
سياسي کارپوه نعمت الله جليلي وايي: «هغه ژمنې وکولای شي له ځمکې په هوا کې عملیات ترسره کړي، دې ته د شک په سترګه ګورو، له دې امله چې القاعده او داعش اوس په داسې حالت کې دي چې له ځمکې هوا ته راکټ وتوغوي ترڅو ګواښ رامنځته کړي.»
طالبانو د افغانستان د ځمکنیو خدمتونو، د هوايي چلند امنیت او هوايي حریم مدیریت د اماراتو ګاک شرکت ته سپارلی، خو تر اوسه هم سترو هوايي شرکتونو افغانستان ته خپلې الوتنې نه دي پیل کړي.
اقتصادي کارپوه سید مسعود وايي: «په دې برخه کې د پانګونې هڅول ډېر مطرح دي او د پانګونې د زیاتوالي لامل به شي.»
افغانستان له خپل فضایي حریم څخه هرې الوتکې له تېرېدو ۷۰۰ ډالر عاید ترلاسه کوي، خو واک ته د طالبانو له رسېدو وروسته د افغانستان له فضا څخه د تېرېدونکو الوتکو شمېر د ورځې له ۴۰۰ الوتنو ۱۰۰ الوتنو ته راټیټ شوی دی.
