په خوست ولایت کې یو ځوان په شخصي لګښت په لیرې پرتو ولسوالیو کې له ماشومانو ښوونځيو ته د شاملېدو لپاره عکسونه اخلي.
دغه ځوان مدني فعال نقیب الله ځلاند دی، چې کلي په کلي يې ښوونځیو ته د ماشومانو د شاملولو کمپاین پیل کړی.
ښاغلی ځلاند هغو ولسوالیو ته سفرونه کوي، چې هر کال نجونې او هلکان د تصویرونو د نشتون له امله له ښوونځيو پاتې کېږي.
![](https://amu.tv/wp-content/uploads/2023/04/Photo-1-1-1024x529.jpg)
هغه وايي: «موږ کور په کور، کلي په کلي ګرځو، هغو ماشومانو ته چې د ښوونځي لپاره برابر دي، د هر ماشوم شپږ قطعې عکسونه اخلو، د تذکرې اخیستو فورمه ورکوو او د هڅونې په موخه یو قلم او یوه کتابچه هم ورکوو.»
ښاغلی ځلاند چې د خوست ولایت صبریو او یعقوبیو ولسوالۍ ته یې سفر کړی وايي، د دوی په هڅو سره به په خوست کې د تېر په پرتله زیات ماشومان ښوونځيو ته شامل شي.
هغه زیاتوي، له دې کاره یې موخه زده کړو ته د ماشومانو هڅونه او د بې وزله په تېرو بیا نجونو لاسنیوی دی.
![](https://amu.tv/wp-content/uploads/2023/04/Photo-2-1-1024x540.jpg)
په دې لړ کې هغه نجونې او هلکان چې تازه په ښوونځي کې شامل شوي په دې کار خوښي څرګندوي.
یو ماشومام عبدالکریم وایي: «که ما عکسونه نه وای اخیستي، نو سږ کال له ښوونځي پاتې کېدم، دا چې عکسونه مې پوره شول اوس به ښوونځي ته ځم.»
یوه بله ماشومه زیبا د خوښۍ په څرګندولو سره وايي: «کله به مې چې وروڼه لیدل چې ښوونځي ته ځي، نو ډیر ارمان مې کاوه، دا دی اوس مې دا هیله پوره شوه.»
د خوست د لیرې پرتو ولسوالیو اوسېدونکي او قومي مشران هم ددغه اقدام هرکلی کوي، خو وايي، په سیمو کې یې ډېری ښوونځي ودانۍ، نلري او همداراز د زده کړو وسایل او د څښاک اوبو له کمښت سره هم مخ دي.
![](https://amu.tv/wp-content/uploads/2023/04/Photo-10-1024x550.jpg)
یو ښوونکی عبدالغفار وايي: «دلته کورنۍ او ماشومان ډېر بې وزله دي، د پیسو درک ورسره نشته، اکثره زده کوونکي هر کال د عکسونو له امله په ښوونځیو له شاملېدو پاتې کېدل.»
قومي مشر حاجي مولوي هم وايي، چې په دې سیمه کې خلک بې وزله دي، د سهار او بیګا د خوړو لپاره څه نه لري.
نوموړی زیاتوي، چې دا ښه فرصت دی، چې ماشومان په وړیا ډول عکسونه واخلي او ښوونځیو ته شامل شي.
د دغو لیرې ولسوالیو اوسېدونکي له نړیوالو بنسټونو او د طالبانو د پوهنې وزارت له مسوولینو چارواکو د دوی د ستونزو د حل غوښتنه کوي.
![](https://amu.tv/wp-content/uploads/2023/04/Photo-5-1-1024x551.jpg)
د سیمې اوسېدونکی حافظ الله فیضي وايي، د ښوونځیو د ودانیو او اړینو امکاناتو د نشتوالي له امله یې ماشومان له ګڼو ستونزو سره مخ دي او له مسوولو بنسټونو غواړي چې د دوی ستونزو ته پام وکړي.
د یادونې وړ ده، چې د خوست ولایت په لیرې پرتو سیمو کې لا هم ښوونځي نشته او ډېری زده کوونکي تر ونو لاندې یا خېمو کې زده کړه کوي چې د سختې ګرمۍ او یا باران پرمهال ډېری ټولګي رخصت وي او ماشومان لوست ته نه شي حاضرېدای.