کمیته دولتی امنیت ملی تاجیکستان اعلام کرده است که در پی یک درگیری مسلحانه در مرز این کشور با افغانستان، پنج تن بهشمول دو تن از نیروهای گارد مرزی تاجیکستان کشته شدهاند.
به گفته این نهاد، این رویداد حوالی ساعت ۱۱:۳۰ سهشنبه شب، ۲ جدی، رخ داده است. کمیته دولتی امنیت ملی تاجیکستان گفته که افراد مهاجم، که از آنان به عنوان «هراسافکن» یاد شده، از اجرای دستور تسلیم شدن سر باز زده و با نیروهای مرزی وارد درگیری مسلحانه شدهاند.
در بیانیه این نهاد که خبرگزاری دولتی «خاور» تاجیکستان آن را منتشر کرده، آمده است که در جریان عملیات نظامی، هر سه فرد مهاجم کشته شدهاند.
گارد مرزی کمیته دولتی امنیت ملی تاجیکستان همچنین ابراز امیدواری کرده است که طالبان تدابیر بیشتری را برای تأمین امنیت مرز مشترک با تاجیکستان روی دست بگیرند.
مقامهای تاجیکستان تأکید کردهاند که در حال حاضر وضعیت در مرز تاجیکستان و افغانستان آرام است.
در همین حال، سازمان پیمان امنیت جمعی پیشتر گزارشهای منتشرشده در برخی رسانهها مبنی بر درخواست تاجیکستان برای دریافت کمک در پی حملههای مسلحانه از خاک افغانستان را رد کرده بود.
این سازمان گفت که دوشنبه در ارتباط با رویدادهای ۲۶ و ۳۰ نومبر، هیچگونه درخواستی برای کمک از سوی تاجیکستان دریافت نکرده است.
