نظیف‌الله سالارزی، سفیر افغانستان در بلجیم در واکنش به تصمیم طالبان در رابطه به خدمات قنسولی در سفارت‌های افغانستان که از سوی دیپلومات‌های حکومت پیشین اداره می‌شوند، گفته است که اعلامیه طالبان «مشروعیت ندارد.»
سفیر افغانستان در بلجیم امروز (سه‌شنبه،۹ اسد) در اکس خطاب به شهروندان افغانستان مقیم بلجیم افزوده است: «سفارت شما در بلجیم برای هر نوع فعالیت سیاسی و ارایه خدمات نزد کشور میزبان اعتبار و مشروعیت دارد.»
او تاکید کرده است که کار در این سفارت به گونه سابق دوام دارد.
این در حالی است که وزارت خارجه طالبان می‌گوید که خدمات قنسولی نمایندگی‌های دیپلوماتیک افغانستان در کشورهای غربی برای آنان پذیرفتنی نیست.
در اطلاعیه وزارت خارجه طالبان آمده است که آنان در برابر سندها و خدمات قنسولی که از سوی نمایندگی‌های دیپلوماتیک افغانستان در لندن، بلجیم، برلین، بن، سویس، اتریش، فرانسه، ایتالیا، یونان، پولند، سویدن، ناروی، کانادا و استرالیا ارائه می‌شود، هیچ مسئولیتی ندارند.
نمایندگی‌های دیپلوماتیک در این کشورها از سوی دیپلوماتان حکومت پیشین اداره می‌شوند و این دیپلوماتان گفته‌اند که به دلیل نبود مشروعیت طالبان، از دستورهای آنان پیروی نمی‌کنند.
