تایمز آسیای مرکزی گزارش داده است که کارشناسان تاجیکستان به دلیل ثبت موارد”وبا” در افغانستان، آب رودخانه‌های مرزی را نمونه‌برداری و آزمایش می‌کنند.
نوروز جعفروف معاون وزارت صحت تاجیکستان اعلام کرده است که از ۱۴ جوزا نظارت گسترده‌ای بر منابع آب مناطق مرزی ختلان انجام شده است.
وی افزوده است که «پنج رودخانه در تاجیکستان از مرز افغانستان می‌گذرند. اگر سیل یا فاضلاب روستاهای افغانستان وارد این رودخانه‌ها شود، ممکن است این بیماری به تاجیکستان سرایت کند».
این در حالی است که شماری از ولایت‌های شمال و شمال شرقی افغانستان در دو ماه گذشته شاهد سیلاب‌های سنگین بودند که باعث کشته شدن ده‌ها تن نیز شد. در همین حال گزارش‌های از شیوع وبا در این مناطق نشر شده است.
