وزارت خارجه طالبان در بیانیهای گفته است که هیئت تاجیکستان در دیداری با امیرخان متقی در باره «تقویت و گسترش مناسبات در زمینههای مختلف به ویژه روابط دیپلوماتیک و همکاریهای اقتصادی» گفتگو کرده است.
این نخستین سفر هیئت تاجیکستان به کابل پس از بازگشت طالبان به قدرت است.
در بیانیه آمده که در این دیدار، متقی گفته است که اداره آنان «به دنبال گسترش روابط حسنه و همسایهداری نیک جمهوری تاجیکستان» است.
او گفته است که این روابط در حوزههای مختلف در حال توسعه است.
بر بنیاد این بیانیه، هیئت تاجیکستان نیز در باره «تقویت هرچه بیشتر مناسبات با افغانستان» اطمینان داده است.
به گفته منابع از میان طالبان، هیئت تاجیکستان شامل مقامهای امنیتی، استخباراتی، وزارت امور خارجه و دیگر نهاد های حکومتی این کشور است.
تاجیکستان که راه خود را بر خلاف دیگر کشورهای آسیای میانه در تعامل با طالبان جدا کرده بود، روز شنبه این هیئت را به کابل فرستاد.
برخی از آگاهان مسایل سیاسی به این باور اند که سفر هیئت تاجیکی به افغانستان به مفهوم آغاز ارتباط سیاسی با طالبان است و این کشور دنبال منافع اش در افغانستان است.
این هیئت شامل معاون اول نیرو های سرحدی کمیته امنیت ملی، فرستاده ویژه وزارت خارجه، سردار ریاست سرحدی تاجیکستان، کارشناس ارشد امنیت ملی، معاون اول ریاست بدخشان ولایت تاجیکستان، سردار ریاست ادارهی کمیته دولتی امنیت ملی و سایر مقامهای امنیتی تاجیکستان است.
این در حالی است که پیش از این یوسف وفا، والی طالبان در بلخ و یکی از افراد نزدیک به رهبر آنان، به تاجیکستان رفت و با برخی مقامهای این کشور دیدار کرد. وزیر دفاع تاجیکستان نیز به تازگی در سفری به پاکستان در باره وضعیت افغانستان با مقامهای پاکستانی گفتگو کرد.
برخی از آگاهان مسائل نظامی به این باور اند که تهدیدهای امنیتی، تهدید قاچاق مواد مخدر و تهدید سلاح از خاک افغانستان، پای مقامهای تاجیکستان را به کابل کشانده است.
تاجیکستان در بیش از چهار سال گذشته هیچ گونه روابط دیپلماتیک با طالبان نداشته و سفارت تاجکستان در کابل نیز در این مدت بسته بوده است.
افزون بر این تاجیکستان در چهار سال گذشته در کنارِ عدم واگذاری سفارت افغانستان در دوشنبه به طالبان از مخالفان آنان به ویژه اعضای جبهه مقاومت نیز میزبانی کرده است.
حکومت تاجیکستان در باره جزئیات دیدار هیئتاش در کابل چیزی نگفته است.
